Tittiro
Gobbate gede sa`u dirrara rosu handaari aana luphiimu qarrinna hiiqqamme xaaddino. Mootimma rosu hiiqqamme sissate sasu diri kawa egennotenninna dandootenni dhaabbino ilama kalaqate, rosu silanchimma buuxisiisate, rosu investimente halashshate, rosu bude woyyeessatenna rosiisaanote dhuka lossate widoonni illacha tugge loossanni afantanno.
“Ilama rosiisaanotenni subbanno; gobba rosunni jiroo`mitanno” yaanno massagote qaalinni qoqqowu deerrinni tenne lamala giddo rosiisaanote xaphishshu songo Hawaasi quchumira Sidaamu budu harira harinsoonni.
Tenne hajo laise Sidaamu qoqqowi pirezidaantichi kalaa Desti Ledamohu rosu hiiqqamme sissate rosiisaanote qeechi haammata ikkinota xawisino.
Battalate leelle sokka sayisinohu qoqqowu pirezidaantichi kalaa Desta Ledamohu coyi`ranni; rosiisaano egennote bu`a ikkitinohura rosu hiiqqamme sissate rosiisaanote qeechi baca ikkinota egensiisino.
Rosu egennote kaima ikkasinni kalaqama baalaho noo egenno, bubbete buuwa, addi addi kalaqote looso loosate, xagicho, caabbicho, hattono wolootta hayyo kalaqate qara coyeeti yiino.
Rosiisaano rosiisate calla ikkikkinni, qoqqowu giddo noo xintu latishshi aanano beeqqaano ikkitanni noota qummeesse; rosu
hiiqqamme sissatenna kalqe hasidhanno qansicha kalaqate rosiisaanote qeechi haammata ikkinota buuxisino.
Mootimma rosu aana leeltanni noo mitiimma tirate xiinxallotenni irkisse sase qara ikkitino hajo aana loossanni no yiinohu pirezidaantichu; rosu hoowe woyyaabbinota assa, rosu mini giddo uduunne wonshanna rosiisaanote ikkadimma buuxisa ikkitinota xawisino.
Konninnino sa`u yannara rosu haaroonshinni haammata rosu minna soorra dandiinoonni; balaxote rosono dagate beeqqonni, loosaasinete damoozinninna rosiisaanote irkonni haaroonsate looso gumulloonni yiino.
Pirezidaantchu rosu hiiqqamme sissa dandiinannihu rosiisaanote xa`mono garunni qola dandiiniro ikkinota kule; deerru lopho baatooshshe yannatenni baantanni gedenna wolootta xa`morano dawaro qollanni hee`noonnita xawisino.
Ikkinohura rosiisaano gobba gufissanno, diigganno, ga`labbo huntanno bissa ledo halantukkiinni qansoota quxate aana calla illachiishshe loosa noonsa yee sokka sayisino.
Sidaamu qoqqowi aantaanchu pirezidaantichinna rosu biiro sooreessi kalaa Beyyene Baraasihu Isi widoonni rosiisaano rosaano quxate noonsa qeechi jawa ikkinota xawise; rosiisaano qoqqowoho rosu islanchimma agarsiisate baraassino qeechinni rosaanote gumi woyyaambe leellishino yiino.
Rosiisaano ilama bilchaatanna jawaata ikkitte fultanno gede loossannote yee; gobbuwa techo iillitinowa iillanna jiraame ikka dandiitinohu rosunninna rosiisaanotenni ikkinota xawisino.
Hasaawu xaphoomunni gobbate deerrinni noo ga`labbo suffinota assate illachiishino hasaawa ikkinotano xawinsoonni.
Qoqqowoho wo`ma ikkitino egennonna dandoo, danchu akatinna tii“a uddi`rino qansicha laashshate dandiinannihu rosiisaanote ledo gamba yine loosa dandiiniro ikkinota aantaanchu pirezidaantichi xawisino.
Bansi woradira Allache rosi mini rosiisaancho ikkinohu Tseggaye Fesheho; rosu hiiqqamme siissate hattono heewisamaano ikkitino rosaano laashshate rosiisaano riqimbannikki qeecha afidhinota xawisino.
Rosaano gumaamenna ikkadda ikkitanno gede yanna uyne loonsanni hee`noonnita buuxisino.
Rosiisaano woyyaawino gumi rosu aana maareekkamanno gedenna hattono gobbate lopho dagganno gede uminsa qeecha fultanni noota coyi`rinohu Cirre xaphoomu layinki rosu mini suppervayzerichi kalaa Geetaahun Birhaanuho.
Suppervayzerichu xawisino garinni rosu hiiqqamme sissate rosiisaano calla ikkitukkinni mootimmano jawa qeechansa fula noonsa; rosiisaanote qoossono agara hasiissanno yiino. Konne agarre loonsiro rosiisaano gobbate keerunna ga`labbo buuxantanno gede jawa qeecha fula dandiitannotano huwachishino.
Battalate beeqqaancho ikkitinoti Daarra Qawaadote xaphoomu layinki dirimi rosu mini rosiisaancho Zebiiba Jemaaliti ise widoonni; rosu gumi woyyaawanno gede assate rosiisaanote qoosso agaranna horonsa ayirrisa hasiissannota coyidhino.
Abrahaam Saamueel
Bakkalcho Onkoleessa 21, 2017 M.D
