Addis Ababa:- Itophiyunna Faransayete mereero daddalu xaadooshshe kaajjinshe sufisiisate balaxo uynoonnita Xaphoomu ministirchi Abiy Ahimed (Dr) coyi’ri.
Xaphoomu ministirchi tenne lamalara addi addi Awuropu gobbuwara faajjete loosu towaanyo assanni afamanno.
Towaanyosinni Faransayete pirezidaantichi Immaanueel Maakrooni ledo lamente gobbuwa xaadooshshenna halamme kaajjishshanno hajubba laisse torbitinota Xaphoomu ministirchi dagoomitte mashalaqqe qoolisira xawisino.
Pirezidaantichu Immaanueel Maakrooni ledo xaadooshshenkenna halammenke kaajjishshanno hajubba lainse lamooshshu hasaawano assinoommo yiino.
Halammenke duuchu handaarinni suffannota ikkitanna roorenkanni daddalu xaadooshshenke kaajjishi’rate illachinshoommo yiino.
Faransayete gobbara assinoonninke koyishshiranna sai Sadaasu aganira Addis Ababaho pirezidaantichu Immnueel Maakrooni ledo assinoommo hasaawinni sunfe harinsoommo gumaamu hasaawi daafira galata shiqisheemmo yiino; Xaphoomu ministirchi Abiy Ahimed (Dr).
Lamooshshu hasaawinni pirezidaantichu Maakrooni sai Sadaasu aganira 2017M.D Itophiya daye towaati yannara iillinoonni sumimme gutunni keentinota Xaphoomu ministirchi borro mini egensiisino.
Lamenti gobbuwa seeda yannara gargarooshshu olanto, ga’labbo, budunna Donnate agarooshshi hattono rosu handaarranni kaajjado xaadooshshenna halamme kalaqqe gutunni loossanni keeshshitinota qummeessinohu borrote mini; tenne lamalara Faransayete harinsoonni faajjete loosu towaanyonna hasaawinnino lamente gobbuwa mereero daddalu xaadooshshe roorenkanni kaajjishate kaayyo afi’noonnita xawisino.
Itophiyunna Faransaye seeda yannara kiirsiisino dipilomaasete xaadooshshi noonsa gobbuwaati. Xaadooshshinsano 17ki sanira albaanni hanafe ikkasi dhagge leellishshanno yiino borrote mini.
Gobbuwate xaadooshshi kaajjanni day kawa kaajjado xaadooshshenna daddalu sumimme assa deerrira iillinoonniha ikkanna; baxxinohunni, Itophiyu Adiwu oli yannara qeelle afidhu gedensaanni Awuropu kiiro Ammajje agani 1897 garinni Itiyo- Jibuuti dannira sumimme malaatisatenni dipilomaasete xaadooshshensa hanaffinota kulloonni.
Sa’u lamala dirrarano lamente gobbuwa mereero noo xaadooshshi babbaxxitino handaarranni kaajjado ikke sufino. Kunino, lamente gobbuwa massagaano xaadooshshi kaajjado ikkasi leellishanno.
Xaphoomu ministirchi Abiy Ahimed (Dr) Faransayete qaru quchumira Paaarisi afamannoha Noterdaami Kaatediraaleno towaatino. Kunino, Donu agarooshshi budunna kalqoomu deerrinni noosi horo leellishannoho yinoonni.
Towaanyo Itophiyaho jawa tiro afidhinotanna rosicho sayissannota kulloonni.
Itophiyu haammata dhaggetenna budu Donna ha’nura ikkasenni Donnate agarooshshinna latishshi ragaanni xaa yannara jawa illacha tugge loossanni afantannota ikkaseno Xaphoomu ministirchi borro mini lede egensiisino.
Turizimete iillo agarooshshe kaajjishanna halashshate loosi gobboomu deerrinni amandoonni onte lophote taqqa mereerinni mito assine loonsanni hee’noonni.
Kalqoomu danchu lawishshinni afi’noonni rosicho halashshatennino Itophiyunnita budunna dhaggete Donna garunni agarantanno gede assatenni albillicho turizimete latishshi loossara illacha tungoonni.
Wole widoonni, Xaphoomu ministirchi Abiy Ahimed (Dr) Xaaliyaanu Xaphoomu ministircho Jioorjiya Meelooni ledo lamooshshu xaadooshshe kaajjishate dandiinanni hajubba lainohunni torbitino.
Hasaawinsannino Itophiyunna Xaaliyaanu mereero lamooshshu xaadooshshe kaajjishatenni haaro Investimentetenna miinju xaadooshshi kaayyo kalaqa dandiinanni garinni torbitino.
Seeda yanna halamme noonsata kullanniri lamenti gobbuwa babbaxxitino lamooshshu hajubba roorenkanni kaajjishi’rate murcidhe loossannota massagaano coyidhino.
Xaaliyaano Itophiyu latishshira qara halamaancho ikkitanna Industirete, fayyimmate, gibrinnunna budu Donna agarooshshi ragaanni seeda yannara gutunni halante loossanni keeshshitino.
Xaaliyaanu kubbaaniyyubba hattono latishshu uurrinshubba halamatenni kaajjite loossanni dagginota kullanni.
Lamente gobbuwa massagaano tenne lamalara assitino hasaawinsanni hegeraamo latishshanna woyyaabbino Investimente halashshate gutunni murcidhe loossannota sumuu yitino.
Xaphoomu ministirchi Abiy (Dr) sai Birra agani 2015M.D Xaphoomu ministircho Meelooni massagaanchimma hanaffuhunni harancho yanna giddo Roomu quchumira leelle Soojjaati Afriki qooxxeessi keerinna ga’labbote hajubba hattono latishshu loossa ragaanni Xaaliyaanu Itophiyaho assitanno irko lainohunni hasaawa assinoti qaangannite.
Abbebech Maatewoos
Bakkalcho Onkoleessa 21, 2017 M.D
