Addis Ababa:- Qoqqowoho gumullanni hee’noonni qinaawino huffannate gaadinni 913 kume 329 qaaqquulle kattawate mixo amande loonsanni hee’noonnita Sidaamu qoqqowi fayyimmate biiro xawissino. Gobbate gede huffannate kittiwaate gaado gumullanni hee’noonniti anfoonnite.
Hajote aana Bakkalcho Gaazeexi ledo hasaawa assinohu Sidaamu qoqqowi fayyimmate biirora qaaqquullu , amuwunna qacalete dayirektoreete dayirekterchi kalaa Imali Lammacha coyi’ranni; qinaawino kittiwaatete gaado Onkoleessa 6,2017 M.D hananfe aantino 10 barrubbara qoqqowoho baalante qarqartora uyinanni hee’noonnita egensiisino.
Uyinanni hee’noonni huffannate gargarooshshi kittiwaate dirinsanni 9 aganinni kayisse 5 diri geeshsha noo qaaqquulle illachishshannota kulinohu handaaru sooreessi; konninni 913 kumi 329 qaaqquulira iillishate mixo amande hananfoonnita qummeessino.
Dayirekterchu xawishshi garinni; qinaawino huffannate gaadi giddosi addi addi xaginaatu owaante uyinanniha ikkanna huffannate kittiwaatera qoteho, sagalete gatto noonsare dirinsanni ontu diri woroonni noo qaaqquulle badate looso loonsanni; konninnino xaphooma qoqqowoho 900 kumi ale ikkannori sagalete gatto noonsa qaaqquulli hee’ranno yine agarrannita qummeessino.
Woluno irkiraano da’muulla xagga tuqisate, kittiwaate hanaffe guddukkinni agurtino qaaqquulle badatenna festullu dhibbi noonsa amuwa bande xagisatenna ledote xaginaate afi’rara dandaanno fayyimmate uurrinsha soyaate looso loonsanni hee’noonni.
Sidaamu qoqqowira baalante qarqatora gumullanni hee’noonniha qinaawino huffannate gaado Onkoleessa 15,2017 M.D geeshsha uyinannita dayirekterchu xawisino.
Qiddist Gezzaheny
Bakkalcho Onkoleessa 14, 2017M.D
