Addis Ababa:- Sidaamu qoqowira sa’u tonne agannara 11 biliyoone biri ale eo gamba assa dandiinoonnita Qoqqowu Eote Biilloonyi egensiisi.
Biilloonyunnihu Qaru Dayrekterchi Kalaa Demisse Isaatu Itophiyu pireesete uurrinshara xawisino garinni; qoqqowoho tayxe baajeettete dirinni 15.3 biliyoone birra eo gamba assate mixi’noonni.
Konni giddonni sa’u tonne aganna giddo11 bixxille 4 biliyoone birra eo gamba assate mixi’ne 11 biliyoone 33 miliyoone 827 kumenna 783 birra gamba assa dandiinoonni yiino. Kunino, tonne aganna mixote gumulshi 86% ikkanna; diru mixonni kayinni 72% ikkasi buuxisino.
Eo sai diri labbanno yannanni ledo heewisiinsiro 2.7 biliyoone birri roorre nootanna eote lophono 32.7% ikkase xawisino.
Kalaa Demisse xawishshi garinni; Sidaamu qoqqowo ikke tantanami yannara 2012 baajeettete dirinni 2.3 biliyoone birra eo gamba assate mixi’ne gumulloonniha ikkanna; diru dirunkunni eote bikki lopho leellishanna tayxe dirinnino 15.3 biliyoone birri ale iillino.
Qoqqowu mootimma diru dirunkunni giddo eo doorshubba mucci assite horoonsidhanni dagoomunnita latatenna lophate xa’mubbara deerru deerrunkunni dawaro qoltanni afantannota qummeessinohu Qaru Dayrekterchi; gobboomu deerrinni loosu aana hosiinsoonniti maakiro ikkonoomete woyyeessono qoqqowunniti giddo eo lophora qara doorsha ikkitinota coyi’rino.
Eo gamba assate hayyo yannitte tekinolojenni irkisantinota assatennino sai 2016 eote dirinni hananfe 13 uurrinshubba Teele- Birrinni giwirensa baattanno gede assa dandiinoonnita egensiisino.
Xaa yannara qoqqowoho deerru deerrunkunni afantannori 45 kumi ale ikkitannori ‘TOT’ borreessantinori giwiru baataano daddalaano afantannotano hattonni.
Amsaalu Felleqe
Bakkalcho Onkoleessa 14, 2017M.D
