Addis Ababa:- Faydu qansootu dijitaalete miinji handaarinni horaameeyye ikkitanno gede jawa kaayyo kalaqinota xaphoomu ministirchi Abiy Ahimed (Dr) xawisino.
Xaphoomu ministirchi Abiy Ahimed (Dr) dijitaale ayimma aana illacha assitino “ID4 Afrika” songo aana xawisino garinni; Itophiyu baalanka horaameessa assitanno yannaasincho, beeqqisaanchonna qara dijitaalete ayimmate badooshshi amanyoote diriirsitino. Kunino qansootu dijitaalete miinji aana noonsa beeqqo lossatenni horaameeyye ikkitanno gede kaayyo kalaqino yiino.
Dijitaale Itophiya adda assate dijitaalete ayimma buuxisiisa hasiissanno yiinohu xaphoomu ministirchi; faydu dijitaale ayimmate badooshshi kaarde calla ikkikkinni hallanyootu taje fojotenni amadatenninna hasiisannoha calla leellishatenni buuxisiisanno baxxino badooshshu kiirooti. Fayinaanse, fayyimma, roso, telekoome lede woloottano dagate owaantubba ledo qineessatenni qansootu hasidhanno owaantera injoo kalaqate loonsanni hee`noonnitano
Faydu Itophiyu Afrikaho rahino dijitaalete miinja kalaqate jawa kaa`lo noosita buuxise; Afriku qaraxiweelo daddalu qooxeessi giddo qara qeecha fulannotano coyi`rino.
Dijitaale ayimmate badooshshi dancha agashshoote safi`rate qara ikkinota buuxisino.
Beeqqaano daggino qooxeessa higganno woyteno baalunku manni addaxxisanno dijitaale ayimmate badooshshi hee`rannosi gede murciraanchimmatenni loosa hasiissannonsata qummeessino.
Xaphoomu ministirchi; Itophiyu billaallino ayimmate badooshshi amanyootinni sa`e, dijitaal Itophiya 2025 istiraateejenni hananfoonni addaxxisanno, baalanka beeqqisino faydu dijitaale ayimmate badooshshi widira reekkamase kaajjishe coyi`rino. Faydaho xaa geeshsha 15 miliyoone ali manni borressamino. 90 miliyoonee manna borreessate mixi`ne loonsanni hee`noonni. Faydu baalunku qansichi baxxinohunni meyaati, wedellunna daramino dagoomi hasiissanno owaante afi`ranno gede assannota xawisino.
Fayinaanse, fayyimmanna roso labbino qara handaarranni qineessinoonnihu faydu, 9.6 tiriiliyoone birra dijitaalete dikkiranni doyaanno gede kaa`lanni nootano xawisino.
ID4 Afriku murrichi Jooseef Atiik (Dr) isi widoonni; Afrikaho dijitaale tiraansformeeshiine buuxisa gadachoho. Techoo barri Afriku dagaha dijitaale ayimma buuxisiisate harinsho hananfeemmo haaro gafaati yee xawisino.
Songotenni latishshu ayimmate badooshshira, ID4 millimmo lainohunni baalunku umisi qeecha fulanno gede huwachinsheemmoho yiino
Afriku massagaano kalqenniha soorramaancho yannate akata hedote giddo woratenni dijitaalete tiraansformeeshiine ijaarshira illachca uyite loosate millimillo hanafansa buuxise; dijitaalete tiraansformeeshiine reekko adda assate dijitaale ayimma buuxisiisa balaxo uyinanni hajo ikkitinota egensiisino.
Afrikaho dijitaale ayimma aana haammata loossa loosantanni noota kayse; kunino Afrikunniha duuchu ragi latishshanna qansootu heeshsho woyyeessate kaa`lannota huwachishino.
Abbebech Maatewoos
Bakkalcho Onkoleessa 14, 2017M.D
