Addis Ababa:- Daayye quchumi wiinamunni lophanni nooha ikkasinni hasiissannota safote latishshuwa halashshate loonsanni hee’noonnita Quchumu Gashshooti egensiisi.
Quchumu Gashshooti Kantiiwi kalaa Maasreshsha Mengistu Itophiyu pireesete uurrinshara xawisino garinni; xaa yannara quchumu lophora hasiissannore addi addi safote latishshi loossa halashshinanni hee’noonni.
Quchumu 12 olluubbanninna mittu quchumu gashshootinni massagamannoha ikkasinni safote latishshi loossa balaxo uyne doogga, xalalu anganni way uurrinshubbanna caabbicho halashshate loonsanni hee’noonnita egensiisino.
Konni albaanni 20 kume ikkanno quchumu teessaano hedote giddo worre xalala anganni way iillisho loonsoonnita xawise; xaa yannara 450 miliyoone ikkanno woxinni projekitete ga’rafo fushshineenna loosantanni nootanna gumulshuno 87% iillase buuxisino.
Gatinoha wo’munni wo’ma gumulate bilchaantetenni loonsanni afamannita huwachishe; ijaarantanni nooti xalalu anganni way projekite 80 kume aleenni ikkanno dagooma horaameeyye assitanoha ikkase buuxisino.
Quchumaho xaa yannara Daayye-Cirre- Lansabo hattono Daayye- Hookko- Arooreessu projekitenni 2 doogga Federaalete mootimma massagonni loonsantanni afantannota Kalaa Maasreshsha xawisino.
Quchumu giddo loosantanno doogga lainohunni seesallicho kincho karatenna kincho tunganni doogga haaro fannanni doogga loosi loosamanni noota kulino.
Wole widoonni, caabbichu dagoomaho hasiissanno owaante aatennino sae qansootaho loosu kaayyo kalaqoranna miinju lophora lowo geeshsha hasiisannoha ikkasinni; quchumaho caabbichu loosira yanna uynannikki hajo ikkasi xawisino.
Caabbichu safote latishshi ragaanni daga kayissanno koffeenyira dawarate caabbichu riqiwote loosira ga’rafo fushshinoonnita buuxisino.
Baadiyyetenni quchuma higge hala’litanni afantanno qooxeessubbara caabbichu iillisho loosira illacha tunge loonsanni hee’noonnita egensiisino.
Quchuma teessaanote injiinoha ikkanno gede hixamanyine loonsanni hee’noonnitano hattonni.
Qooxeessu Buna hala’ladunni latinsanni kalqete dikkora sonkanniha ikkasi kaiminni quchuma addi addi Investimentete loossara injaannoha assinanni hee’noonni yino.
Daayye quchumira Investimentete latishshi halashshate mootimmate uurrinsha korkaata ikkansa kule; insano Hawaasi Yuniversite Daayye Kampaase, Daayye Pooli tekinikete Kolleejenna Daayye Industirete paarke kullannire ikkansa buuxisino.
Quchumu biinfille lossateno co’imma agara, quchumaho haanju harumi loosinni latisate loossano illachunni gumullanni hee’noonnita lede kaysino.
Bizuneh Birhaanu
Bakkalcho Onkoleessa 7, 2017 M.D
