Addis Ababa: Itophiyu afantanno qooxeessi Investimentete dooramaancho assannoseta Pilaanetenna Latishshu Ministircho Fitsumi Aseffa (Dr) xawissu.
Ministircho Investimentetenni Itophiyu 2025 bizinesete foreme aana assitino xawishshinni buuxissino garinni; Itophiyu afantanno qooxeessinna hala`lado iillo noosi Itophiyu diilallote doogo investimentete dooramaancho gobba assitannoseta qummeessitino.
Itophiyu hala’ladonna lophate aana noo gobbate giddoydi dikko nooseta qummeessite; Soojjaatinna Wodiidi Afriki gobbuwa mittimmate dikko (COMESA) safaancho ikkaseno 560 miliyoone dagata dikkote kaayyo afi’ra dandiissannoseta egensiissino.
Afriku wolaphote daddali qooxeessirano mitte bixxille shoole biliyoone mannira iillanno assate dandiisanno bati’rino wolaphote daddali qacha ikkasino qummeessitinoti Ministircho; kunino Itophiyu Afriku dikkora e’anno gedeno albisa dooramaancho gobba assannose yitino.
Itophiyu ikkado mannu wolqa lendeenna haammata Investimentete kaayyuwa noose yitinoti Ministircho; xaphooma dagase kiironni 54 miliyoone wedellanna qajeeltinota mannu wolqa ikkaseno wole injiino akata ikkasi kayissino.
Sebsahaaru Afrikira heedhanno onte jajjabba miinjuwanni mittu Itophiyunniha ikkasino ledote kaayyo ikkinota; lawishshu gede sai diro 8.1% lopho borreessiisase qaagiissitino.
AKG 2023/24 3.9 biliyoone doolaare gobbaydi suwashsho investimente goshoosha dandaase buuxisse; tinino Soojjaati Afrikira albisa, Afriku deerrinni qole 3ki gobbaydita suwashsho Investimente iillo assitinose yitino.
Xaphi assine la’nanni woyte Itophiyu miinji kalqete aana rakke lophate aana noo miinjuwanni mittete yitinoti Fitsumi (Dr); sai diro gibrinnu handaarinni 6.9%, Industirete handaarinni 9.2%, owaantete handaarinni 7.7% lopho borreessiisaseno huwachishshino.
Itophiyu gumultanni nooti wo’ma Maakiro Ikkonoomete woyyeessonna poolisete woyyeesso qaafubba gobbaydi suwashsho Investimentera ledote injo kalaqqannore ikkansa buuxisse; dureeyye noota Investimentete kaayyuwa hegersatenni doodhitino handaarira jironsa duntanno gede woshshatto shiqishshino.
Demmellaash Demmeqe
Bakkalcho Onkoleessa 7, 2017 M.D
