Addis Ababa:- Sa’u aganna giddo afi’noonni rosichuwa halashshatenninna qoqqowu eltubba latisatenni dagannita latishshu xa’mubba qolate loonsanni yiino; Sidaamu qoqqowi pirezidaantichi kalaa Desta Ledamo.
Qoqqowunnita sa’u aganna mixo jeefishsha keenatenna aantete faasho aana amaaltannota massagaanote bare Hawaasi quchumira harinsoonni.
Pirezidaantichu Desta Ledomo tenne yannara xawisino garinni; isilancho mixo qixxeessine jawaante jeefisatenni dagannita latishshu xa’mo dawara hasiissanno.
Dagannitanna massagaanote dhuka qineessine loosa dandiiniro buxima qeelatenna jireenya buuxisiisate assinanni harinsho harancho yanna giddo jeefisa dandiinannita coyi’rino.
Sa’u aganna giddo afi’noonni rosichuwa halashshatenninna qoqqowu giddo noo dhuka bande latisatenni dagate latishshunna danchu gashshooti xa’mubba dawarate illachinshe loonsannita xawisino.
Qoqqowoho qixxeessinanniti massagaancho mixo guma gantannotanna dagate xa’mo dawartannota ikka hasiissanno yiinohu Pirezidaantichu; jeefishshaho massagaano isilanchimmatenni loossanno gede huwachishino.
Sa’u aganna giddo xaaddino hekkonna afi’noonnihu danchu rosichi aanino diri mixora kaima ikkannota qummeesse; dooramino rosicho qineessanna halashsha hasiissanno yiino.
Owaante uyinanni hayyo haaroonsa lendanna danchu gashshooti qarrubba tirate hanafantinori uurrinshu loosu harinsho kaajjisha barete balaxote illacha ikkasino Pirezidaantichu lede kayisino.
Konninni, handaaraho leeltanno qarrubba tiratenni dagate gutu horonsiraanchimmara qinaambe loonsannita coyi’rino.
Qoqqowu daga poletiku, dagoomittetenna miinju beeqqonna horonsiraanchimma buuxisate hanafantino loossa sufaanchimma buuxisate mittimma kaajjisha hasiissannonsata lede huwachishino.
Qiddist Gzzaheny
Bakkalcho Onkoleessa 7, 2017 M.D
