Addis Ababa:– Assinanni hee’noonniri seerunna poolisete woyyeesso qaafubba gobbayidi xaaddote investimentera injoo kalaqansa Pirezidaant Taayye Atsqesillaasehu xawisanni; Itophiyaho assinanni hee’noonniri seerunna poolisete woyyeesso qaafubba gobbayidi xaaddote investimentera injoo kalaqqino.
Assinoonniri miinju woyyeesso qaafubba sufo noota miinju lopho borreessiisate, gobbayidi xaaddote investimente goshooshatenna miinju tantanote reekko gumulsate kaa’litannota xawisino.
Gobbayidi dureeyyera cufante keeshshitino handaarra fanate gobboomu haaroonso, seerunna poolisete woyyeessonna babbaxxitino handaarranni investimente goshooshate widoonni illete leellino guma borreessiissanni afantanno. Kunino Itophiyu taalo lophote doogo aana afantanno gede assinose yiino.
Itophiyu nooseti dagate kiiro batinye, kisantinokkiri investimentete kaayyuwanna diriirsinoonniti injiitinoti loosu amanyootta Investimentete injiitinota assannoseta huwachishe; poolise investimentete injiitinota assa, safote latishshuwa halashshanna lifixa owaante heedhanno gede dandiisate addi addi loossa gumullanni hee’noonnita egensiisino.
Diriirsinoonniri jawaachishshu amanyootta dureeyye investimentensa halashshidhanno gedenna sufaanchimma buuxissanno gede kaa’litannore ikkansa qummeessino.
Foreme Itophiyu nooseha investimentete dhuka leellishate jawa kaayyo ikkase kayisinohu Pirezidaantichu; handaaraho noo hekkonna malu hedo shiqqannowa ikkinota noosi ammana xawisino.
Woxu ministirchi Ahimed Shidehu isi widoonni; Itophiyu hala’lado baatto, luphiima waayi jiro, wedellanna qajeeltinota mannu wolqanna wo’mu safote latishshi nooseta ikkase investimentete injiitinota assinose yiino.
Dureeyyete lifixa owaante aate dandiisannoha injiino amanyoote kalaqate loonsanni hee’noonnita qummeesse; konnirano dijitaale tekinoloojenni irkisantinota mitte furcho owaante hananfoonnita qummeessino.
Mootimma ga’labbi yitino maakro ikkonoomenna sufo noota miinju lopho bowirsate kalaqamu miinju woyyeesso gumultinota kayise; woyyeessotenni hallanyu handaari beeqqora balaxo uyinoonnita qummeessino.
Dureeyye miinju woyyeessonni hallanyu handaarira uyinoonni illacha garunni huwatte investe assitanno gede woshshatto assino.
Seerunna poolisete woyyeesso hattono daddalunna investimentete injoo kalaqate qaafo jawa guma abbitanni no yiino. Itophiyu kaappitaale dikko loosu giddora e’’aseno heewisamaanchimmanna hallanyu handaarinni massagamanno miinja bowirsate luphiima kaa’lo noosita xawisino.
Investimentete komishiine komishinere Zelleqe Temesgenihu (Dr); Itophiyu investimentete dhuka egensiisate loonsanni keeshshinoonni. Foremete aana 59 gobbuwanni fultino beeqqaano beeqqitanni afantannota xawisino.
Handaaraho woyyaawino seeri, lallawunna wodho handaara baqqi assatenni luphiima soorro abbitanni afantannota qummeesse; dureeyye mootimma illacha uyitino gibrinnu, shiilote, turizimete, manufakcheringetenna ICT handaarrara investe assitanno gede loonsanni hee’noonnita xawisino.
Qiddist Gezzaheny
Bakkalcho Onkoleessa 7, 2017 M.D
