Haroo Itophiya yeemmo wote Itophiyu akkale egenninokkita de”me dikkino. Itophiyu di soorrinanni uddanooti;di akkalanno. Kayinnilla gobba akkalsannohu Poletikaho. Mitte gobba bushu poletikinni xurtanno. Mundeetenni hayishshantanno. Hattonni Itophiya xursiisino HWHT poletiki ba”eenna gobba haaroo’mitanno yitanno he’xxo’ya hexxo calla ikkitukkinni noo halaaleeti.
Haaru diri daanno wote akkalino uduunne mito fushshine hunnanni;haaruunni riimbanni. Woyyaawannonna seyaanno yine hendanniha hayishshine maareekkinanni. Xa 27 diri poletiki Itophiya xursiisino. Su’mase bushatenni kayisiisino. Kalqe maccansa kayisse Itophiya bushu su’minni qontissanno gede kaayyo fanino. Ee; akkalinohu soorrama hasiissanno. Gawajjannohu kayinni hige higannokkiwa ea hasiissanno.
27 diri giddo winxoonni babbadamooshshu wixi sayinsummo sasu diri giddo laaleenna mixxinanni keeshshinoonni. Mixxinayi guma mixxioonni. 27 diri giddo winxoonni gumi laaleenna mitu daramino;mitu abbalamino. Mitootuno lekkanna anga hooggino. Manchi beetti loosisinni mixxona beebbaataamma saadano ma cubbunsanniiti bombunni giirantuhu?! Saada giirantino. Sircho hunate loosino May-kaadirunni Aliyye Olantote Kaampe geeshsha;Affaarete Galikoomunni- Agamsa geeshsha,Zoowunni-Cina geeshsha ikke saino. Xaano mito mitowa noolla.
Ikkina konne assanno Junta mucuqqi assine feyatenni haaroo Itophiya kalaqa mayi cubbo afidhino?! Ee, Itophiya haaroonsinanni diri konneeti! Kuneeti albankeenni no 2014 M.dirooti. xurtino anga hayshanto. Xursiissino anga waamanto! Itophiyu hakkawote haaroo’manno. Itophiyu ajuujano adda ikkitanno.
Diru soorrami kiiro amuwwu hindiiddo,qaaqquullu mundee,saadatenna mannu darti kowiicho uurra noosi. Miteekke Juntu soqqamaano mucuqqi assa kaajjitara dandiitanno. Korkaatuno insa godowinsara galtinoreetina!
Godowaho jine jawa gobba diiga;bayira gobba shiimurichira soorra mimmito itammanni hee’ra iimano uullano xa’misiissanno. Godowaho galtinori giddoyidi godowaamma mittore huwatte; “Sagaleno godowahooti;godowuno sagaleteeti; lamunku mitteenni ba’anno” yaanno bayiriidi qullaawu maxaafi. Roore Juntu godowaamma duuchankare adhitino gedeenni ba’ino. 2014 M.Diri kayinni Juntuno,Juntu soqqamaanono ba’eenna Itophiyu daga keere afidhe,Ajuujansa wo’miteenna galataho shiqqannore ikkitara halcho’yaati.
2013 M.diri jeefora huwatoommori hee’riro Itophiyu diigantukkinni la”ayaati. Ee,di diigantanno. Mangiste yaa Itophiya dikkitino;Itophiyu Itophiyaho; Mangiste dagge Mangiste sa’anno wote,daga ilante daga sa’anno wote,ilama dagge ilama sa’anno wote,Itophiyu kayinni Itophiyankolla! Konniraati Itophiyu diigantukkinni laoommohu.
Anera ajuuja nooe. Ajuuja’ayano Itophiyu diigantukkinni la’’a’yaati. Haaro Ajuuja,Haaro Hexxo,Haaroo Mootimma=Haaroo Itophiya! Haroo mangiste sanfannihu Wocawaaro 24/2014 m. dirooti. Haaruu diri daanno wote haarore agadha nootella . ani kayinni Haaroo Itophiya, cancu baeenna ga’labbo dirritinoha,gaance co’o yiteenna keeru dirrinose Itophiya; babbadamooshshu danqari hiiqqameenna mittimmate qanchi kalaqaminose Itophiya laeemmo ajuuja’ya 2014 M.Diri albankeenni fule Soodimari Bakkalchi gede wora’a yaanna laeemmo. Hashshino gedeenni digatanno. Hashshu beewe beewe mare bakkalchu fule xulbu yitanno faarso gede haaroo hexxonna haaroo ajuujanni diinu hexxo waamanteenna,daraminohu qaesi higeenna la’neemmo diro ikkankera halchummo!
Keeru diro!
Bakkalcho Fooqa 4/2013 M.D Hamuse
