Addis Ababa:– 4ki gobboomu dandoote heewo tekinolojetenni, dandootenni hattono loosunni leellishate xiinxallo aana illachishshinota ikkase Loosunna Dandoote Ministircho Muferihat Kaamili coyidhu.
Heewo Kolleejjete, kilaasteretenna qoqqowu deerrinni harinsanni keeshshineenna xaa yannara gobboomu deerrinni qeeltannore bandannita ikkase qummeessitino.
4ki yannara harinsanni hee’noonni gobboomu dandoote heewo 22 handaarra aana illachishshinota ikkase kulte; shoolu deerrinni yaano Kolleejjete, kilaasteretenni, qoqqowunna gobboomu deerrinni 100 kume ikkitanno beeqqaanonna daa’’ataano heewo beeqqitinota kulte; heewotenni afi’nanni tekinolojubba loosu giddora eessate Ministere loosu mini addi addi irko assinota xawissino.
Konninni, kalaqote laalchubba dikko shiqqanno harinsho kalanqannita kulte; Itophiyu konni dirinni kalqoomu dandoote maamari miila ikka dandiitinota qummeessitino. Kunino, deerru deerrunkunni harinsoonni heewubbanni afi’noonni seyoo ikkasi Ministircho egensiissino.
Ministircho Muferihati xawishshi garinni; heewo dandooteno aleenni tekinolojete laalchubba widira reekkantinotenna duuchu dani qarrubba tirtinote.
Gobboomu deerrinni 4ki yannara harinsanni hee’noonni dandoote heewo “Bilchaata buqqee; dandootenni ikkadda qansoota” yaanno adawarshinni IFDR Tekiniketenna Ogimmate Inistitiyutera harinsanni hee’noonni.
Heewoteno qajeelshiishaano, qajeelaano,,a Interpirayzootunni gaammoonnita ikkitanna; heewote ledote tekinolojetenna Interpirayzootu laalchubbansanna owaante egensiissanni afantanno.
Amsaalu Felleqe
Bakkalcho Dotteessa 30, 2017 M.D
