Addis Ababa:– Sutamatenna Kaote ayyaani keerunni ayirrisamanno gede Komishiine kaajjado balaxote qixxaawo assitinota Sidaamu Qoqqowi Poolisete Komishiine Komishinerichi Shimellis Toomaasi coyi’ri.
Komishinerchu Itophiyu pireesete uurrinsha ledo bilbilunni assino keeshshonni xawisino garinni; Komishiinenniti qara sokko dagate keeraanchimmanna hobbaate agaratenna agarsiisate yee; dagate ayyaanna keeraatunni ayirrisantanno gede qoropho hasiissanno hajubba aana illacha tunge loonsanni hee’noonnita qummeessino.
Komishiinete gede konni albaanni addi addi dagate ayyaannanna qixxaawubba keerunni ayirrisante keerunni jeeffanno gede dagate ledo qinaanbe loonsanni sa’noonnita kule; 2017M.D Mootichu Iyyesuusi Kiristoosi Sutamatenna Kaote ayyaani qoqqowu deerrinni keerunni ayirrisame jeefanno gede olluubbatenna woraddatenni hananfe balaxote qixxaawo assinoonnita xawisino.
Ayyaanu ledo amadisiisaminohunni dikki’rate amayooti yannara mite mite seerimale daddalaano sagalimmate horoonsi’nanniri giddo allaggichore karsiisse dikkote shiqishshannori heedhara dandiitannohuranna togoo asootubba dagoomu fayyimma gawajjitanno daafira balanxe gargarate dandiinanni garinni dagoomunna hajo la’annonsa uurrinshubbanni ledo gutunni hasaamboonni garinni halamme loonsanni hee’noonnita egensiisino.
Komishiinerchu Shimellisi xawishshi garinni; dikkuwate giddo kaphunnita Birru nootte amadde dagooma awaawuratenni dikki’rate wo’naaltanno bissa heedhara dandiitanno daafira qorophotenninna illachunni loosa agarranni.
Tenne yannara baxxinohunni caabbichonna giira horoonsi’rate ledo amadisiisame hedeweelcho giirate dano kalaqantara dandiitannohura dagoomu elekitiriikenna giira ragunninna qorophotenni horoonsi’ra agarrannitanna huluullissanno ikkitubba heedhuro qooxeessaho afantanno ga’labbotenna hajo la’annonsa bissara qummeessa aa hasiissanno yiino.
Ayyaanu keeraatunninna hobbaatunni ayirrisame jeefamanno gede balaxote qixxaawo assinoonniha ikkirono; Tiraafiikete dano, mooru, mulqa, seerimale waagu lexxo hattono hedeweelcho kalaqantanno ikkitubba heedhuro baatooshshiweelo bilbilu kiiro 8295 hattono mashalaqqenna qummeessa haa’nanni mereershira 0462209164 bilbilu kiironni mashalaqqe aa dandiinannita qummeessino.
Konni ragaanni olluubbatenni qoqqowu mereershi geeshsha dagoomu ga’labbote bissanni ledo qinaawatenni ayyaanu keeraatunni ayirrisame jeefamanno gede hala’lado loossa loonsanni hee’noonnita kaysino.
Kaote ayyaani keere; baxillenna mittimma ikkasinni Iyyesuusi Kiristoosi tenne uullara daynohu keerenka batisara ikkasinni Mootichinke manchi beetti cubbi kaiminni umosi sayse uyinonte gede ninke kayinni noonkehu aaninni qoonce hoogginorenna dhuku anje noonsare itisatenna uddisiisatenni baxillenkenna halammenke leellisha noonke yaanni amadisiise sokkasi saysino
Amsaalu Felleqe
Bakkalcho Dotteessa 9, 2017 M.D Hamuse
