Afrika albira tareessa wedellu qeechaati
Albi Afriku massagaanonna jajjabbu annuwi Arfiku wolaphora sharrante kawiichira iillishshinoha Afrika albira tareessa wedellu qeechaati yee IFDR pirezidaantichi Taayye AtsiqeSillaase xawisi.
Pirezidaantichu Paan Afriku wedellu massagaano songo adiwu qaaggora harinsi yannara assino hasaawinni; kakkachimma wo`mitinoha baarigaarimmate sana sharramatenni jawa jifo sayisse kawiichira iillishshinori albi Afriku massagaanonna jajjabba annuwaati yiino.
Itophiyunna Afriku mittimma halammensa kaajjishshe suffannota egensiissu
Itophiyunna Afriku mittimma sa`u 50 dirrara sufinoha lamooshshu halammensa kaajjishshe suffannota egensiissu.
Itophiyunna Awuropu mittimma 240 miliyoone yuuro latishshu irko sumiimme malaatissino
FDR woxu minisrichi kalaa Ahimed Shide; sumiimme Itophiyunna Awuropu mittimma 50 dirranni halammete harinsho giddo qara tiro noosetanna mittimma haammata harinshonni Itophiyaho assitannota kaajjado irko caakkeessitanno qaafo ikkitinota xawisino.
Itophiyaho Awuropu mittimma ambaasaaddercho Soofi Firom- Emesberger ise widoonni; Itophiyunna mittimmate xaadooshshi yanna yannatenni hala`litanninna kaajjitanni daggino kaajjado halamme ikkitinota xawisse; kuni xaadooshshi halammete handaarra halashshatenni aantino dirrarano sufannota buuxissino.
Itophiyu Cayinanna Mongoliya gafamino maala soyaa hanafase jawa seyoo ikkinota xawinsi
Itophiyu sa`u lee aganna giddo islanchimmasinna hobbaatisi agaraminoha gafamino maala Chayinanna Mongoliya soya hanafase jawa seyoo ikkinota Itophiyu gibrinnu biilloonyi qaru dayirekiterchi ambaasaadder Dirriiba Kuma egensiisino.
Sa`u lee aganna giddo miile kuarantayinenni 400 kume gorro saada fayyimmansa buuxatenni biilloonyu sertefikeetenni baara widira soyaatenni 28 miliyoone doolaare ale afi`noonnitano buuxisino.
“Shewaal Id” turizimete handaara miinju buichimma widira tareessate kaa`lannota xawinsi
Shewaal Id turizimete handaara miinju buichimma widira tareessate assinanni sharronna seyoo kaajjishannota Harerete qoqqowi pirezidaantichi kalaa Ordiin Bedri xawisino.
1446ki Id Alfexir harunse lamalate gedensaanni ayirrinsannihu shewaal id ayyaani Harerete quchumira danchu garinni ayirrisamino.
Amuraatu aana hasaawa assinohu qoqqowu pirezidaantichi kalaa Ordiin Bedri; shewaal id kalqete dona ikke borreessamasi Harerootunniha budillaancho festivaale ikkatenni sae Itophiyunniha hattono kalqenniha gutu balchooma, budenna hornyubba xawinsanni hincilaallo ikkino yiino.
Itophiyu wodiidi Suudaane dagara assitanno kaa`lo kaajjite suffannota xaphoomu ministirchi egensiisi
Itophiyu wodiidi Suudaane dagara assitanno kaa’lo kaajjite suffannotanna muricidhe loosa hanaffinota xaphoomu minisitirchi Abiy Ahmed (D/r) egensiisino.
Xaphoomu ministirchi Abiy Ahimed gobbate pirezidaantichi Salva Kiiri Mayarditiwiinni sonkoonni sokka wodiidi Sudaane aantaanchu pirezidaantichi Benjaamiin Bol Meli anganni adhasi lainohunni dagoomittete qooli aana sayisino sokkanni; Itophiyu wodiidi Suudaane dagara assitanno kaa`lo kaajjite suffanno yiino.
Wodiidi Suudaanera nooha yannate keerunna poletiku qarra tirateno hanqafaancho ikkitino olluu harinsho hasiissannota xawisino.
Kalaa Geetaachew Redda Tigirayete qoqqowi yannate geeshshi gashshooti pirezidaantimmanni ayirrinyunni geegiissinoonni
Geegote amuraati aana Xaphoomu ministirchi Abiy Ahimed (D/r) Kalaa Geetaacho Redda baraasino qeechira galata shiqishino
Dagatenni ammanamooshshu noonsare doorshu boorde loosu massagaano miilla doorantanno gede loonsannita xawinsi
Dagate ammanamooshshu noonsa gobboomu doorshu boorde loosu massagaanonna miilla doorantanno gede loonseemmo yaatenni gobboomu doorshu boorde dooramaano miilla filaano komite gambisaanchi Qesiis Taagay Taaddele xawisino.
Xaphoomu ministirchi Abiy Ahimed (D/r) Afriku mittimma komishiine murrichi Muhaammed Ali Yesuufi ledo xaade hasaawi
Tenne lamala giddo xaphoomu ministirchi Abiy Ahimed (D/r) Afriku mittimma komishiine murrichi Mehaammud Ali Yesuufi ledo xaade jajjabba qooxeessu keerinna ga’labbote hajubba aana hasaawa assino.
Ameerikunna Iraanete qursama
Ameeriku pirezidaantichi Donaald Tiraamp Iraane nukileerete uduunni hajo lainohunni Ameeriku ledo hasaawate hasatto noose yee ammanannota coyi`rino.
Pirezidaantichu odeessaanote uyno xawishshinni; “Iraane sayikki bisi widoonni hasaawa hasidhinonkanni; xa kayinni hedose soorritinoha lawannoe” yiino. Waashingiten Tehiraani ledo xaadatenni hasaawa assitanno yitanno hexxo noositano xawisino.
Bakkalcho Dotteessa 2, 2017 M.D
