Addis Ababa:- Cabbe woradira dagate huluullo ikkite keeshshitino xa’mubba dawarate qoqqowu mootimma ledo halamme loonsanni hee’noonnita woradu gashshooti xawisi.
Woradu gashshooti qaru gashshaanchi kalaaa Taaddese Mekuriya Itophiyu pireesete uurrinshara xawisino garinni; baajeettete dirinni hala`lado mixo mixi`ne loosu giddora eatenni daga horaameeyye assate loonsanni hee`noonni.
Dooggate safote latishshi ledo amadaminohunni ka`anno xa`mubba dawarate lamu garinni loonsanni afammannita qummi asse kalaa taaddese; umikkihunni dagate beeqqonni olluunni ollaa xaadissannota 50 kiilo meetire ikkitanno doogga loosate mixi`noonniha ikkanna; 40 kiilo meetire ikkitanno doogo daga uminsanni loosi`ra dandiitinota xawisino.
Layinkihunni dooggate gatamarshinna waay pirojekitubba mootimmate irkonni gumulantannota buuxise; shiimmadda buussa daga uminsa beeqqonni loossanni afantannotano coyi`rino.
Woradu giddo seeda yannara dagate latishshu xa’mo ikke keeshshinori mereero Cabbenni Hamaraaro xaadissannoti 9 kiilo meetire ikkitano doogo loosi sufame afamannota gashshaanchu xawise; konneno harancho yanna giddo loonse gunde daga horameeyye assinannita buuxisino.
Wole widoonnino Qarsa Buduussi ollaa Osolete ollii ledo xaadissanno doogonna Bo’nooru buusi safote latishshi loossa kaajjadu garinni gumulantanni noota huwachishino.
Amadisiiseno woradu giddo badheessu yanna loosinni 1 kume 727 hekitaare baatto latisate mixi`ne loonsanni hee`noonnita xawise; woradaho baatto loosidhe galtinorira dooramino sirchonna daapi yinanni madaabbara hala`ladunni iillinsha dandiinoonni yiino.
Sa’u 9 aganna giddo loonsoonni haanju harumi looso sa’u lamalara keennoonnita qaagiissinohu gashshaanchu; noo laafanna kaajjado midaado bande aantete mixotenni loosate hajo la’annonsa bissa ledo sumuu yinoonnitano qaagiissino.
Mitu mitu ollii giddo haanju harumi loosi lowo geeshsha danchanna hagiirsiisannoha ikkasi gashshaanchu lede xawisino.
Bizuneh Birhaanu
Bakkalcho Dotteessa 2, 2017 M.D
