Hawaasa:- Qoqqowoho sagalete wowe sufino garinni buuxisiisate rumuddate laalchubba latishshira jawa illacha tunge loonsanni hee’noonnita Sidaamu qoqqowi Irshunna Kalaqamu Jiro Latishshi Biiro egensiissu.
Biirote Sooreessi Kalaa Memmiru Moke Itophiyu pireesete uurrinsha ledo assino keeshshonni xawisanni; badheessunna goyirete yannara latinsanni fiqaaqunna agadu gidira qoteho rumuddate laalchubba latishshira illacha tunge loonsanni hee’noonni.
Qoqqowoho sagalete wowe sufino garinni buuxisiisate baxxinohunni Weesete latishshira addi illacha tungoonni yiinohu Kalaa Memmiru; konni albaanni nootana woyyaawino laalcho uytannore Weesete sirchubba batisate looso loonsanni hee’noonnita qummeessino.
Konni kaiminni, si dirira loosidhe galtinori gate xaphoomunni 136 miliyoone Funta qixxeessinoonniha ikkanna; loosidhe galtinori xaa yannara 60 kume hektaare baatto loose qixxeessatenni Funtu kaashsho harissanni afantannota xawisino.
Xeenu sai Ammajje 30 geeshsha agarroonni bikkinni gana hoogirono Badheessa 1 hanafe gananni noo daafira baatto garunni loonse qixxeessatenni wixate loosi kaajje sufanni afamannota qummeessino.
Wesse hala’ladunni afantannokkinna moolle gawajjitanno qooxeessubbara Weesete sircho halashshate loonsanni hee’noonni.
Baxinohunni, worichaamenna gammoojje qooxeessubbara xeenu anje kalaqantanno yannara gidu ba”ano daafira woyyaabbinota Weesete sirchubba filatenni kuri qooxeessubbara halashshate loonsanni hee’noommo yiino.
Sooreessu xawishshi garinni; Dinnichuno qarunni sagalimmate hosannoha ikkasinni 13 kume hektaare baatto aana latisate hende xaa yannara 10 kume hektaare aana latinsanni hee’noonni.
Filaminoha Dinnichu sircho 20 kume kuntaala shiqishate hende xaa geeshsha 11 kume kuntaala loosidhe galtinorira shiqinshoonni.
Sagalete wowe buuxisiisate rumuddate sirchubbanni Weese, Dinnicha, Maxaaxeessa hattono fiqaaqu gidinni Hayxe qoleno agadu gidinni Badala jawa illacha tunge laashshinannire ikkansa buuxisino.
Sagaletenna sagalete amanyoote buuxisiisate dandiisiissanno sirchubba yine bandoonnire badheessunna goyirete yannara hattono arri gorsu latishshi loossanni illacha tunge laashshinannire ikkansa qummeessino.
Amsaalu Felleqe
Bakkalcho Badheessa 25, 2017 M.D
