Olunni afi’nanniri mitturino horo aannori dino. Olu woxe gude,jajja hune,hakkiinnino sairo riqiwo nookki manchi beetti lubbo hunanno. Kuni hiitti gobbano ikkito fullahaano hattono olu uduunne dikkote shiqishshanno albisaano gobbuwa huwattino halaaleeti. Ikkollana qarra hasaawunni tira dandiinanni hee’ne olaho kakka’’a hunotenna baote tugganno ikkinniina tirfu dino.
Xa Sudaane mayi bainoe yite ikkitannoro afate qarrisa geeshsha yanna yanna agarte gaance kayisate assitanno harinsho taxi yaa di dandiitino. Itophiyaho dannunni xaaddannoti tini gobba babbaxxino balchoominni mittoomu xaadooshshi noosete. Seedu diri xaadooshshino nooseta kullanni. Ikkollana karishete gede dananna akata soorritanni Itophiya qussatenni dirra gibbino. Sa’u yannara giddoyidi Junti kayisino gaance dago assidhe seeda baatto itophiyunnita horrate wo’naaltino. Itophiyu kayinni Sudaanetee ledo noo qarra olunni ikkikkinni dipiloomaasetenni gudeemma yitanni xaa geeshsha dandiitinolla.
Adda coyi’rate Abbayi kofattonni umi horaameessa ikkitanno gobba heedhuro Sudaane ikkitinota Xiinxallaano reqecci assitanni afantanno. Hiddaasete kofatto umi gafa waa wonshini kawa hinqaatu qarriseenna keeshshitino sudaane yananna yannatenni qaamattonsa afidhanni noota xiinxallo xawissanno. Hattono seeda yannara wayi ga’re qarrisannonsanna darantanni keeshshitino baatto umi gafa wonshini kawa qoortino baattora wirro teesa hanaffino.
Mayi baeennaseetiro anfoonnikki Sudaane yanna yannatenni qussase di uurrissino. Itophiyu xaano jawa kaayyo uyite dandaatenni agartella afantanno. Beri hashsha 8 mereershira fincante afantanno Juntu gaamo maxarre gundoonnita tuqu xaadooshshira xawishsha uyinohu Jeneral Baaca Debelehu, tenne dagonni Sudaane iillishshanni noo qarra kayisikkinni di saino. Eewa ‘’Sudaane dannaho gaance kayissanni afantanno;Itophiyu kayinni ola di hasi’ranno. Dipiloomaasete hasaawinni tirro yaatenni lame sase hige gamba yino’’ yee; ‘’Itophiyu xaano ola di hasi’ranno; togo yaa kayinni qixxaawo di assanno yaa dikkitino’’ yaatenni duu’re xawisino.
Eewanni mitte Sudaane hakko isonni xoonnetenni fultinokki gobba olama hasidhuro ayirrisama waajja ikkitinokkita huwata hasiissanno!
Jeneral Baaca Debelehu yaatto garinni Sudaanete sayikki anga ikkite noori Juntu giggilooti. Kuni kayinni co’o yaa hasiissanno. Juntu giggili mucuqqi yee goofiro Sudaanete hajo waa kayissannlota dikkitino. Sudaane ola hasidhannoha ikkiro Itophiyu basso cu’midhinota labboonkensa. Kayinnilla keeru woyyanno;araaru woyyanno. Xaano araaru dirrara hasaambe tirrara xaano hasattonkeeti. Kayinnilla olu qixxaawo Itophiyu di assanno yaa dikkitino.
Abbayi hajo godowase cortinoha ikkiro,xaano gufisate dhuki dinose. Dannu hajono ikkituro hasaawunni tirrannite. Suudaanete fullahaanonna ogeeyye hiddaasete kofatto gobbansara afisiissanno horo huwattannohura mangittensa harissanno uurrinsha sodhinota ikkitinota xawissanni afantanno. Kofattote horo Suudaanete lowote. Konne huwattinoti mite mite Suudaanete fullahaano yitanno garinni Itophiyu Hiddaasete kofatto yaa Gibitsete Asiwaani kofatto ikkitino deerraati. Asiwaani kofatto Gibitsete afisiissino horo anfoonnite.GibitseAsiwaani kofattonni afidhanno gedee horo Suudaane hiddaasete kofattonni afidhanno.
Suudaanete mangitte hiddaasete kofatto aana noo so’rote uurrinsha lainohunni Suudaanete qansooti baxxeewo garinni Suudaanete odeessaano hala’ladunni effidhannonna gibbannote yitanni afantanno. Kayinnilla baalaho taalo buqqee aannokki daafira umonsa baxxanno Sudaane qussitanni afantanno. Ikkolana olunni tira cucuqqi yitino doorsha ikkituro qixxaawono noota afa hasiissanno.
