Tittiro
Hayyubbanna budubba xabbe leeltino leellishooti. Soojjaati Afriku daga hayyubbanna budubba xabbe leeltno festivaale batinyu illacha adhitino. Sa`u harunsitino barrubbara Addis Ababaho harinsanni keeshshinoonnihu layinki soojjaati Afriki hayyubbatenna budu festivaale qixxaawo danchu garinni jeefisantino.
Festivaale “Hayyonna budu qasiisote halammera” yaanno adawarshinni badheessa 11/2017 M.D hanafe Addis Internaashinaal Konveenshinete mereershira harinsoonni. Itophiyu, Jibuti, Somaaliyu, Wodiidi Suudaane, Ruwaandu, Yugaandu, Tanzaaniyu, Demokiraatiik Ripabliik Koongonna Burundinni filantinori 140 hayyotenna budu gaamo festivaalete aana beeqqitinota mashalaqqubba leellishshanno.
Festivaale gobbuwate mereero dagate xaadooshshe kaajjishate, budu dipiloomaasenna qasiisote halamme lophitanno gede injaanno akata kalaqqannota ikkase xawinsoonni. Gobbuwa budensa egensiissanno gedenna mimmitu ledo ogimmate rosicho beeqqitanno gede dandiissannota ikkaseno xawinsoonni.
Gobbuwatenni daggino gaamo mereerinni Yugaandunni kalaa Lusi; tini hayyotenna budu festivaale soojjaati Afriki egennammera qaraho yaanno. hoyyonna budu keeru, latishshu, lophotenna soorrote doogo ikkansa xawisino.
Gobbasira 65 ale fakkana ayimmubba noota coyi`rinohu kalaa Lusi; tini fakkana ayimmubba luphiima miinjittenna dagoomitte horo noonsata buuxisino. Itophiyu qixxeessitino layinki Soojjaati Afriki festivaale fakkana ayimmanke egensiisate jawa kaayyo kalaqqinota ikkase huwachishino.
Baxxinohunni bare noonke donubba, afuubba, sirbuwanna wolootta labbinore fakkana ayimmubba Soojjaati Afrikinni sae gattino kalqera leellinsheemmo gede assitino yiino.
Sidaamu qoqqowinni kalaa Daawiit Feyyisa isi widoonni; festivaale budenke egensiisatenna qasiisote gobbuwa ledo dikkote xaadooshshe kalaqate kaa`litannonke yiino.
Umihunni festivaale budenke egensiinseemmo gede kaayyo kalaqqinonke, aaneno noonke budillaano laanchubba daafira huwanyo kalaqatenni sufo noosi dikkote xaadooshshe kalaqi`neemmo gede assitannota ikkase xawisino.
Festivaale Soojaati Afriki mageeshshi geeshsha hayyotenna budu eltaame ikkase huwata dandoomma yitinoti qole Burundinni Emi Bitalote. Festivaale mittu wolootu ayimma afanno gede kaayyo kalaqatenni sae qasiisote gobbuwa keerunna latishshunni xaadisate jawa kaayyo nooseta xawissino.
Abbebech Maatewoos
Bakkalcho Badheessa 18, 2017 M.D
