Addis Ababa:- Loosinke suffino gobba ijaarreemmohanna dandaaminke bikkinni bidhatto ajinsheemmo safo tugate yaanni Gobboomu Amaalamme Komishiinerchi Yoonaas Addaayye (D/r) xawisi. Aanino doorshinna Gobboomu Amaalamme mittu diri giddo harisamansa kibbisiisannonsari marichino hee’rannokkita leellishino.
Komishiinerchu Yoonaas (D/r) Itophiyu Pireesete Uurrinsha ledo assino hasaawinni egensiisino garinni; Gobboomu Amaalammeti qara hexxo qeelaanchunna qeelamaanchu baxxannota ikkitukkinni; baalunku qeelaancho ikkannote. Itophiyaho keeru bude ikke sufanno gede wo’ma hasatto no. Mimmitunniwa hasaawatenniiti ikkinnina mimmito shaatenni kayinni tiro daggannokkihura amaalamme bude assi’ra hasiissannote. Komishiineno loosu suffino gobba ijaarrannihanna dandaami bikkinni bidhatto ajinshanni safo tugate. Konnira qolte yanna hasiissannote yiino.
Komishiinerchu Yoonaas (D/r) yiino garinni: babbaxxitino gobbuwa noo rosichi leellishannonte gede amaalammete hajora yanna seedisa lowontanni rosantinota ikkaseeti. Hakko iso mite mite gobbuwa rosichi leellishannohu loosu yanna mitte hinge ikkikkinni lameho, sasenna shoole hinge ikkasiiti. Yanna seedisa calla ikkikkinni mite mitennihu soorramannohu isinni gobbaydi bissa ledonniinti.
Ninketi Gobboomu Amaalamme kayinni ha’nurimma dagannite. 99 xibbuu anga ikkanno woxino daganniho. Gobbaydinni uynanninke woxi hee’riro nafa Itophiyu daga uynanniho ikkinnina ninkera di’ikkino yiinohu Komishiinerchu; seyoosira mitturichino huluullisannonke coyi dino yiino. Qaranna jawa timo kayinni baalanka qeelaancho assatenni seekka dandaate yaannino xawisino.
Yoonas (D/r), Amaalammete komishiine lendoonnise mittu diri yannanni loosose gudate loossannota qummeesse; amaalamme Itophiya suffe harissanno doorshi ledo ayee sorrono kalaqannokkita ikkase xawisino.
Aanino doorshinna Gobboomu Amaalamme mittu diri giddo harisamansa xaaddannonsahu ayee coyno diheeranno yiino. Korkaatuno ninkera lendoonninketi mittu diri yanna 2018 M.D geeshsha noote. Doorshu kayinni 2018 M.D Onkoleessu aganira harisamannoha ikkasi xawisino.
Ninke doorshu hee’rirono doogonke amande sunfeemmo. Yoote mini sufanno. Pooliseno suffanno yiino.
Isi xawisino garinni; Gobboomu Amaalamme su’mise umisinni qummeessannonke gede gobboomunniho; Amaalamme Jireenyu Paarte woy Izeema ka’a woyteno Onegi di’ikkitino. Paartootu dirunna garu gede kalaqantannoreetinna Itophiya lossitannoreeti. Itophiyu kayinni hegerera heedhannote. Konninni kainohunni baalanka woyte albira suffanno gobbara uminsa qeecha uytannoreeti.
Gobboomu Amaalammenna doorshu mitte woleho guficho di’ikkitanno; sayinsete garinnino kibbisiisannonsahu mittu coyno nookkita leellishino.
Demmellaash Demmeqe
Bakkalcho Badheessa 18, 2017 M.D
