Tayixe Fichee Cambalaallate ayyaana ayirrinsanni woyte giddosi amadino hornyuwa agarranninna agarsiinsanni ayirrisa hasiissannota Sidaamu qoqqowi woga turizimenna ispoortete biiro egensiissu.
Qoqqowu woga turizimetenna ispoortete biiro sooreessi kalaa Jaggo Agenyehu ayyaanu anmanyoote lainohunni uyno xawishshinni; ayyaanu halantino mootimmuwa rosu, sayinsetenna budu mereershira UNESCOte manchi beetto riqibbanno kikkinsannikki dona ikkatenni borreessaminkunni 10 diro kiirsiisinota egensiisino.
Tayixe Sidaamu diru soorro ayyaana Fichee Cambalaalla techonni hananfe ga’a sooreessu gudumaalira iibbadu amuraatinni ayirrinsanni.
Sooreessu ayyaanu tayxe baxxino garinni ayirrisamannota coyi`re; ayyaanu Sidaamu dagara diru soorro ikkasinnino aleenni jawa tiro noosi ayimmate xawishsha ikkinota xawisino.
Fichee Cambalaallate barra roduuwu daga, maatetenna fiixu firu hattono baxillaanote ledo mittimmatenni ayirrinsanni yiino.
Kalaa Jaggo xawisino garinni; ayyaanu sooreessu gudumaalira ayirrisamihu gedensaanni qoqqowoho afantanno woradda hattono baara wido iibbadu garinni ayirrisamannota buuxisino.
Ameerikaho Atilaantu gashshootira afantanno Itophiyu komuniite ayyaana iibbadu garinni ayirrisate qixxaabbinotano lede egensiisino.
Qoqqowu mootimma komunikeeshiinete hajubba biiro sooreessi kalaa Weseniyelleh Simioonihu isi widoonni; Sidaamu daga hundinni agarte amadde kalqete deerrira iillishshinoha Fichee Cambalaallate ayyaana hornyasi roore luphi assanno garinni ayirrisa hasiissannota xawisino.
Fichee Cambalaalla xaa yannara Sidaamunni sa`e kalqete dona ikkitinota qaagiissinohu sooreessu; konne ayyaana ayirrisidhanno daga mittu gudumaalira gamba yaatenni dukkisantannotano sooreessu coyi`irino.
Ledoteno Kalaa Weseniyelleh; ayyaanu ayidde ikkitino Sidaamu daga wosinchose naaxxisanno garinni adhatenni Ficheete sirnyuwa xawisanno garinni ayirrinsanni yiino.
Bakkalcho Badheessa 18, 2017 M.D
