Addis Ababa: meessi dhukinni ijaarroonni Abbayi kofatto ijaarshihu gaabbote mazigawi cufamate 6 aganna calla gattinota IFDR xaphoomu ministirichi Abiy Ahimed (Dr) xawisi.
Xaphoomu ministirichi Abiy Ahimed (DR) tenne xawisinohu sa’u lamalara hamusete barra harinsi dagate riqiwamaano amaale mininni ak’ino xa’muwara dawaro qoli yannaraati.
Diro, koo/tee, amma’no, gosa, bude wkl badinsakkinni otoottote giddo noo marqinna waammate giddo noo manna agurranna Itophiyu qansooti mitteenni halantinoha; kalqoomu hekko giddiidi wolqanni dandootenni qeeltinohu, Itophiyunnino sae qooxeessunna Afriku gobbuwa ayirrinye ikkinohu gaabbote mazigawiti Bayi’ra Reekkote Kofo dhagge ikkite uurritaranna aamammesino kulantara 6 agani callu gatinosi yaanniiti xawisinohu
Xaphoomu minnistirchi (D/r) Amaalete Mini miillanni ka’ino xa’muwa lainohunni uyno dawaronninna tittirshinni xawisino garinni; Reekkote Kofo ijaarshi ha’rinshonni duucha shetto leellititinosete; Reekkote Kofo bati’riro aantino lee agannanni mitteenni riivaane (hagiirru afanshi malaate) mudhineemmo.
Reekkote kofo Afriku naaxxille, wo’mu Afriki dandoo leellitinosete, sorono taashshinoonnite, gidddiidi umbeno murci’ne taashshinoonnite; 74 biliyoone meetiriki kiyube wayi amandoonnitenna jawa wolqa bue laashshinannite yaannino coyi’rino.
Afriku dagara liqoo ho’lininsaro, dipiloomaasete hekko assininsaro uminsa jiro qansootinsanni latisanna soorra dandiitannota loosunni rosiissinota ikkaseno qummi assino.
Maassote 6 agani hasiisinohu qixxaawo hasiissannohuranna qoxeessu iibbado ikkasi ledo amadame hawadi xeeni hasiisanno daafira ikkasi leellishatennino; Kofo daanno diri hanafo aana dhagge ikkite sa’annota ikkitanno yaannino leellishino.
Abbay Kofo mittu birri irkono ikkito liqoo gobbaydi gobbuwanni afi’nikkinni ijaarroonniho, ijaarshuno duucha jifo leellitinosihonkanni yaanni qaagiissino. Woxunna gobbaydi hekko ajjukkinni waaco hirreenna gobbate giddora e’u gedensoonni hodhise iillishsha lowo geeshsha mitiinsitinota qaagiissinohu Xaphoomu Ministirchi Abiy (D/r); Kofote ijaarshira hossanno waaco lame agannanna bocunni ajjinokkita Jibuuti Furchonni Abbay Kofo geeshsha ga’labbote wolqanni dukkisante hodhisantinotano leellishino.
Birehu Gibtsete gobbaydi hajo Ministirchinna Hobbaatu Mootoonsaanchi ledo lame hinge hasaawa assinooommo yiinohu Xaphoomu Ministirchi Abiy (D//r); hasaawisinni ninke mixo wolqa laashshate, ki’ne gawajja dihasi’neemmo yaasi qaagiissino.
Abdili Fetta Alsiisi “kofo wo’mitanno woyte Asiwaani Kofonni mitte litire wayi xeannokkita qaale e’’oommonkanni. Abbay wayi wo’munni wo’ma wo’mino. Hoodeteno Asiwaani Kofono wo’munni wo’ma wo’mitino; konnino qaalu gumulamino xeinorichino dino” yaannino leellishino.
Xaphoomu Ministirchi Abiy Ahimed (D/r) xawishshi garinni; wo’ma Itophiyu daga sannate gaabbo mazigawa ikkitinoti Bayra Reekkote Kofo qaaggose dhagge ikkiteenna 180 barrubba giddo jeefisantanno.
Gaazeexu Odeessaanchinni
Bakkalcho Badheessa 18, 2017 M.D
