Hawaasa:– Oromiyu qoqqowi mootimmanni Sidaamu qoqqowi Aliyye Sidaami zoone Lakkote quchumira ijaarsiinsoonniha Ifa Boru jawiidi 2ki dirimi rosi mine bero maassiinsoonni.
Rosu mini 170 miliyoone ale birra fulo assinoonniha ikkasino kulloonni.
Maassote amuraati Aana sokkasi sayisinohu Sidaamu qoqqowi pirezidaantichi Desta Ledamo tenne yannara coyi’ranni; hayyotenni mallironna falliro qarrubba meessi wolqanni, gadate halammenni hattono irkisaano bissanni ledo ikkatenni dagate xa’mora garunni dawaro qola dandiinanni yaanni huwachishino.
Oramiyu qoqqowi gashshooti rodiimma kaajjitinota ikkase xawisinohu pirezidaantichu Desta;Albillichono lamente daga halammenna mittimma kaajjite suffannota qummeessino.
Pirezidaantichu; sa’u shoole dirrarano qoqqowu dagaha latate xa’mubbara deerru deerrunkunni dawaro qollanni dangoonnita qaagiisse;hayyo buusaho;mittimmano wolqate yaatenni, ilamate ille fantannore ikkadda rosu minnanna wiloottano safote latishshuwa halashshatenni gutunni horaameeyye assate illachinshe loonsanni hee’noonnita coyi’rino.
Lakkote quchumira ijaarsiinse faajjetenni maassiinsoonnihu Ifa Boru jawiidi layinki dirimi rosi mini ilamate ille fanannoha deerrasi agadhinoha, ikkasinnino Oromiyu daganna mootimma galatino pirezidaantichu.
Maassote amuraati aana leellinohu Oromiyu qoqqowi pirezidaantichi Shimellis Abdiisa coyi’ranni; lamente qoqqowubba daga mittimmanna halamme kaajjishatenni latishshu loossanni gutunni horaameeyye assinanni hee’noonni yiino.
Hawalle tayxehu Sidaamu daga haaru diru soorro Fichee Cambalaallate ayyaanira keerunni iillishi’ne yiinohu Pirezidaantichu Shimellis; lamenti daga dhaggetenni, budunni hattono babbaxxitino hornyubba gutantannore ikkansa coyi’rino.
Sidaamunna Oromo sa’u seeda yannarano addi addi yannara ka’anni keeshshitino qarrubba gitunni tidhitanni keeshshitino daga ikkansa kule; afi’noonni mittimmanna seyoonnino gutunni horaameeyye ikkitanni afantannota qummeessino.
Sidaamu qoqqowi Rosu Biiro Sooreessi kalaa Beyyene Baraasihu coyi’rino garinni; ijaarroonnihu kuni Ifa Boru jawiidi 2ki dirimi rosi mini 170 miliyoone ale birra Oromiyu mootimmanni woxu irko fulo assinoonniha ikkasi kulino.
Qoqqowoho rosu isilanchimma buuxisiisateno rosu minna deerra woyyeessatenni hattono balaxote rosira illacha tugatenni hananfoonni millimillonni woyyaawu gumi maareekkamanni nootano xawisino.
Aliyye Sidaami zoone qaru gashshaanchi kalaa Biruk Selemooni isi widoonni; barraho maassaminohu rosu mini isilanchimmasinni hattono diizaynetenni baxxinohanna deerrasi agadhinoha ikkasi kulino.
Rosu mini qooxeessaho ijaaramasi lamente daga mittimmanna halamme kaajjishannoha ikkasino hattonni.
Rosu mini qooxeessu dagara aanno horo jawa ikkasennino irko assite ijaarsiissino Oromiyu qoqqowi mootimma zoonete daga su’minni galatino.
Tayxeha Sidaamu daga haaro diru soorro Fichee Cambalaallate ayyaana laisseno sooreeyye wo’manta Sidaamunna Itophiyu daga hattono ayyaana ayirtissannore baalanka hawalle iillishi’ne yitanno sokkansa sayissino.
Amsaalu Felleqe
Bakkalcho Badheessa 18, 2017 M.D
