Addis Ababa:- Hawaasi quchumi e’’ote biilloonyi sinu borro mini settu agani giddo 3.2 biliyoone xaphoomu e’’o gamba assinota xawisino.
Biilloonyunnihu qaru dayirekterchi kalaa Melku Maarqoosihu xawisino garinni; uurrinshunna maazzagaaju mini giwirinni sai settu agani giddo xaphooma 3.2 Biliyoone birra e’’o gamba assinoonniha ikkanna; diroho amandoonni mixonni 65% jeefisa dandiinoonnita qummeessino.
Tini e’’o sa’’i diri labbanno yanna ledo heewisiinsanni woyte 39% roorre leellishshinota kulino.
Amandoonni diri sette aganna giddo uurrinshu e’’o jeefishshi 103% ikkanna maazzagaaju mini e’’o kayinni 75% ikkase xawise; konni jeefishshi woffi yaara koru baxxinohunni liizete e’’o yannasenni gamba yite goofa hooganna tajete islanchimma qarra ikkinota xawisino.
kalaa Melaaku ledotenni dagannita latishshu hasatto kassi assa dandiinannihu e’’o garunni gamba assinirooti yee, e’’o gamba assate harinsho kayinni e’’ote loosu minira calla agurranni looso ikkinokkita xawisino.
Daddalaano ammanamatenni giwire baattanno gede huwachishe; darrasanya suwashshimmatenni aa hasiissannonsatanna horonsiraanono darrasanya adhate rosichonsa bowirsidhanno gede sokkasi sayisino.
Uurrinshate aana assinoonni soorronni, haaruudde tekinoloojete gumulonni; giddoyidinna gobbayidi qarrubba garunni bande gumaamo looso loonsonnihura illete leeltino soorro dagginota coyi’rino.
Hawaasi quchumi e’’ote biilloonyi sinu borro mini uurrinshu owaante taaksete bikkinna gamba assate daayirektoreete dayirekterchi kalaa Birhaanu Eeliyaasihu isi widoonni; e’’ote jeefishshi gumaa’mara taje qineessatenni ledote asalu harunso assinoonnita xawise, xaaddonnita ikkitinonni taakse aana assinanni hee’noonni harunsonna suwashsho e’’ote mu’ro wora jeefishshaho luphiima kaa’lo assitino.
Vaatete e’’o lopho ragaanni mixotenni amandoonnihunni 147% afi’noonniha ikkanna sai diri labbanno yanna ledo heewisiinsanniw oyte 116% lopho leellishshinota kalaa Birhaanu coyi’rino.
Qiddist Gezzaheny
Bakkalcho Badheessa 11, 2017 M.D
