Addis Ababa:- Tayxeha Sidaamu daga diru soorro Fichee Cambalaallate ayyaana ayirrisate balaxote qixxaawo gumulloonnita Sidaamu qoqqowi woga turizimenna Ispoortete biiro xawissino.
Biirote layinki sooreessinna turizimete handaari sooreessi kalaa Abbebe Maarimohu Itophiyu pireesete uurrinshara xawisanni; Fichee Cambalaallate ayyaana iibbadu garinni ayirrisate hasiissannota balaxote qixxaawo gumulloonnita kule, baxxinohunni Hoteella aganu albaanni hanaffe qixxaabbanni keeshshitinota coyi’rino.
Tayxeha Fichee Cambalaallate ayyaana qoqqowu garinni badheessa 18 na 19/2017 M.D Hawaasi quchumira budu amadosi agarino garinni ayirrinsannita xawise; mitte lamala albaanni hanaffe quchumu giddo Kaarnivaaletenna babbaxxitino ha’nura bude xawissanno qixxaawo heedhannota egensiisino.
Konni gobbaanni doogimaroho heedhanno qansootiranna dhuka ajjino maatera barrinna hashshi hurbaate itisa tayxe ayyaana baxxannoha assitanno hajo mereerinni mittete yinohu kalaa Abbebe; konni alba ayyaana ayirrisate wosinna Guji, Arsi, Wolayittu, Hadiyyunna labbeemme qachu zoonnanni calla koyinsannita kule; tayxe kayinni wo’mate gobbate qoqqowubbanni koyisantino wosinna qoqqowo e’annota egensiisino.
Fichee Cambalaallate ayyaani dagate mittimmanna jaalooma kaajjishatenni ledote qoqqowu miinju lophora noose qeechi luphiimaho yiinohu kalaa Abbebe; qoqqowono ikko Hawaasi quchuma turizime goshooshshanno ikkitubba mereerinni fichee cambalaalla luphiima qeecha amaddannota huwachishinno. Ayyaana ayirrisate lowo kiiro afidhino daa’’ataano quchuma e’annota lede buuxisino.
Tayxe Fichee Cambalaallate ayyaana Sidaamu qoqqowira calla ayirrinsanniha ikkikkinni; konni albinte gede Addis Ababaho Sidaamu kominite qineessonni ayirrinsannita xawisinohu handaaru sooreessi; wo’mante kalqera baxxinohunni wodiidi Afrikira, Ameerikaho Siyaatili, Waashingiteni DC gashshoottara, Xaaliyaho, Ferensayetenna woloottu Sidaamu ilama ikkitino daga heedhanno quchumma baalantera ayirrinsannita egensiisino.
Jeefoteno wo’manta gobba giddonna gobbaanni heedhannore Sidaamu ilama ikkitino daganna ayyaana ayirrissanno gobbatenna kalqete daga baalantera hawalle Sidaamu daga diru soorro fichee cambalaallate ayyaanira keerunni iillishi’ne yitanno sokka sayisino.
Qiddist Gezzaheny
Bakkalcho Badheessa 11, 2017 M.D
