Addis Ababa:- Seerimale gaamo Piritooriyu keeru sumimme garinni daramaasine qaensa qollanni harinsho gufissanni afantannota Tigirayete qoqqowi yannate geeshshi gashshootira sommoonni pirezidaantichi xawinsoonni.
Kalaa Geetaachew Redda sa’u muli barrubba giddo Addis Ababaho afantanno Dipilomaatera uyno xawishshinni; Piritooriyu keeru sumimme garinni daramaasine qaensa qolatenna qodhaano qodhonsa tirsiinse dagoomu giddora qolate hananfoonni wo’naalshi seerimale qodhaano gaamonni gufi’rino.
Yannate gashshooti Piritooriyu keeru sumimme kaiminni safaminoha xawadimmanna yawo noosiha, hattono seerunni adhamooshshu naasiha ikkasi xawise;ikkeennano, seerunni adhamooshshu noonsakkiri mite mite HWHT gaamo boode qodhaanote massagaano ledo halante qoqqowoho babbaxxitino qooxeessubbara mootimmate biilloonye wolqisse adhate millissanni no yiino.
Tigrayete daganna yannate gashshooti Piritooriyu keeru sumimme garunni gumulantanno gede hasidhanno yiinohu Geetaachew; boode HWHT seerimale gaamo kayinni yannate gashshoote wolqatenni diigate kalaqqino qarrinni keeru sumimme diigginota xawisino.
Kuri seerimale gaamo hunote assoote kalqoomu dagoomi seekke huwatara hasiisannotano huwachishino.
Itophiyu Gobboomu Haaroonshi Komishiine Federaalete mootimmanna kalqoomu dagoomi irkonni 10 kume ikkitanno albi qodhaano qodhonsa tirsiinse wirro dagoomu giddo albi heeshshonsa heedhanno gede assate hananfoonni millimillo kuri gaamonni gufidhinota qummeesse; Tigrayete qoqqowo hembeelatenna gaance kalaqantanno gede assate wo’naaltanni afantanno bissa kalqoomu dagoomi huwate assootinsanni eemarantanno gede xiiwo assara xa’mino.
Gobbaydi Hajo ministirchi Gediyoon Ximootiwoos (Dr) tenne yannara xawisanni; Piritooriyu keeru sumimme garunni gumulate ragaanni boode mommodda heedhurono; Federaalete mootimma guuta ikino garinni gumulate loossanni afantannota coyi’rino.
Piritooriyu sumimmehu qaru illachi ola uurrisa ikkinota qummeesse; mootimma Tigrayete qoqqowira kalaqantinota yannate hajo illachunni harunsitanni afantannota kulino. Piritooriyu keeru sumimme garunni gumulantanno gede assate qoqqowu yannate gashshootinna kalqoomu dagoomi ledo halamme loonseemmo yiino.
Afriku Halamme Poletiku, Keerunna Hobbaatu komishiinerchi Ambaasaadder Baankoole Adiwoyyo isi widoonni; Tigrayete qoqqowira kalaqamino qarri keeru doogonni hajo la’annonsa bissa baalanti qeechansa fultanno gede xa’mino. Qarrubba keeraatunni tirate assinanni wo’naalshira Afriku Halamme hasiissanno irko assitannotano lede coyi’rino.
Gaazeexu Odeessaanchinni
Bakkalcho Badheessa 11, 2017 M.D
