Addis Ababa: Xaaliyaanu mootimmanni assinoonniti woxu irko hallanyu handaarinni bunu laalchira babbakkino bissata fayinansete mitiimma tira dandiissannota ikkase gibrinnu ministeere egensiissino.
Xaaliyaanu mootimma Itophiyu bunu handaarira; Daddalu Baanke widoonni galtannota 10 miliyoone Yuuro seeddinsoonni liqoo oyimbarra fajjitino.
Hatte yannara Gibrinnu Ministirchi Girma Amante (D/r) xawisino garinni; Itophiyu mootimma bunu laalchi isilanchimma lossate, soyaate wolqa ledatenna loosi’re galinohu eo lossate 15 diri istiraateeje qineessite loossanni leellitanno.
Tenne mixo seekkate assinanni hixamanyenni woxu shiqo jawa mitiimma ikite ka’anno. Xaalaanu mootimmanni uyinoonniti 10 miliyoone Yuuro liqoo; hajo la’annonsa bissanninna mootimmate widoonni handaara lossate loonsanni loossa irkissanno yaanni coyi’rino.
Woxu irko bunu laalchinni manaadunna mereerimunni bobbakkinore; wolqansa lossate woxu liqoo hasidhannori halanyu handaari bobbahaanora wolqa kaajjishannota ikkitinota leellishe; bunu balchoomi xaadooshshe lossate ragaannino qeechise jawaho yiino.
Ministirchu coyi’rino garinni; gobbate gede onte miliyoone ali maate heeshshonsa qarunni bunu laalchi aana safantinote. Itophiyu gobbara sokkanno laalchuwa giddonni mittu sayikki anga ikkitannota amadinohu bunu laalchooti.
Konni ragaannino bunu laalchimma lossa; loosu kaayyo kalaqatenna qansootunnita dagoomittenna ikonoomete wolqa boowirsate qeechise jawaho yaanni xawisino.
Sa’u onte dirrara Itophiyunniti buna soyaate daddali jawa lopho leellishanni no yiinohu Girmi (D/r); sai baajeettete diro bunu fulote daddalinni mitte bixxille 43 biliyoone Doolaare afi’noonniha ikkanna; tayxe baajeette dirinni sette agannanni mitte bixxille 2 biliyoone Doolaare eo afi’noonnita kulino.
Soorro daggara dandiitinohu bunu handaarinni assinoonni babbaxxitino woyyeessonni ikkitinota qummeesse; tayxe baajeette dirinni lame biliyoone Doolaare afi’rate mixi’noonnitanna tenne mixo seekkateno Xaalaana lendeenna woloota bissawiinni assinanniti faynansete irko jawu qeechi nooseta ikkase qummi assino.
Itophiyu bununna shaete billoonyi qaru dayrekterichi Addunya Debela (D/r) xawisino garinni; bunu handaarira leellitanno mitiimmuwanni mitte loosidhe galtinori; handaaraho bobbakkino shiimmaaddanna manaadda daddalaano hasidhanno shiqo afi’ra hoogansaati.
Fayinansete irko assinoonnihu woxu shiqo ledo amadante xaaddanno taanto ajishate ikkase leellishe; togo yaa bunu shiqishaanchi hasi’ranno bikkinninna yannanni liqoo afi’ratenni loosi’re galinohuwiinni buna hidha dandaanno gedenna loosi’re galinohuno horaameessa ikkanno gedeeti yaanni xawisino.
Loosidhe galtinoriranna sokkannorira shiqannohu liqoo tareessote amanyootinniiti yiinohu qaru dayrekterichi; loosi’re galinohu laalchu ha’rinshora hasiisannosi woxe adhe; laashshe hiri gedensoonni qolanno; soyaannohuno loosi’re gallohuwiinni hidhe buna hiri gedensoonni woxe qolanno lifixishsha diriirsinanniiti yiinohu.
Liqoo uynannihu sase wodhonni ikkanna; insano loosu kaayyo kalaqa, qooxeessaho noosi qeechinninna ikonoomete abbara dandaanno soorro hedote woratenni ikkinota qummeesse; konni ledo amadante liqoo hasidhannori piropoozaale shiqishshanno gede oyimbarrinni kayisse woshshatto shiqqinota qummeesssino.
Demmellash Demmeqe
Bakkalcho Badheessa 11, 2017 M.D
