Addis Ababa:- Mootimmatenna dagate dhuka qineessatenni quchummatenna baadiyyete gumulantanni noo latishshu loossa leeltanno soorro abbitanni noota Sidaamu qoqqowi pirezidaantichi Desta Ledamo coyi`ri.
Qoqqowoho daganniha miinjittenna dagoomitte horaameeyyimma lossitanno duuchu ragi latishshu loossa gumulantanni nootano xawisino.
Pirezidaantichu qoqqowu yannate hajubbanna gumulantanni noo latishshu loossa lainohunni uyino xawishshinni; qoqqowoho dagate miinjittenna dagoomitte horaameeyyimma lossitanno duuchu ragi latishshu loossa gumulantanni no yiino.
Dagoomunniha gutu jireenya buuxisiissanno latishshu loossa sa`u shoole dirra giddo illachunni gumulamansanni danchu gumi dayinotano xawisino.
Xaa yannara maatete miinjitte horaameeyyimma buuxisa dandiitanno maatete jireenyi paakeeje qixxeessine loosu giddora e`noonnita xawisinohu pirezidaantichu ;babbaxxitino qooxeessubbara gumullanni innisheetiivubbanna paakeeje noositano xawisino.
Pirezidaantichu xawishshi garinni; qoqqowoho doogotenni, xalalu waayinni, fayyimmatenni, rosunni, caabbichu owaantenna wolootta safote latishshi handaarranni islanchimmanna tuqishsha buuxisiisate gummaamma loossa gumulantino.
Qoqqowunniha kalaqamunna mannunni loosantino eltuwa horoonsi`ratenni qansoota loosu kaayyo horaameeyye assate gumulantino loossanni haammata horaameeyye assa dandiinoonnitano hattonni.
Konninnino sa`u shoole dirrara qoqqowoho 300 kume ikkitanno qansootira loosu kaayyo kalaqa dandiinoonnita coyi`re; loosu kalaqo handaara kaajjishate loosu kaimi kaapitaale, loonsanninna hirranni bayichubbanna babbaxxino garinni assinanni irkubba kaajjite suffannono yiino.
Baatto loosidhe galtinorinna laashshaanote handaari laalchimma tiro noosi garinni lossatenni dikko geisate looso illachunni loossanni nootano xawishshunni buuxisino.
Hiikku latishshino buuxamannohunna guma abba dandaannohu deerru deerrunni dagoomu annimmatenni beeqqatenni ikkinota coyi`rinohu pirezidaantichu; konninnino mootimmatenna dagate dhuka qineessatenni quchummatenna baadiyyete gumulantanni noo korideretenna babbaxxitino latishshu loossa dagate horaameeyyimma aana leeltanno soorro abbitanni nootano xawisino.
Xaa yannara baxxinohunnino quchummate gumulamanni noo koriderete latishshi loosi quchumma injitinorenna dooramaano assate aleenni dagoomunniha loosu bude soorrinonna haammata qansootano loosu kaayyo horaameeyye assanni afamannota lede buuxisino.
Baalanti daga qoqqowoho noo addaxxisanno keerinna latishshu millimillonni horaameeyye ikkitanni afantannota qummeessinohu kalaa Desti; qoqqowoho dagooma babbaxxino latishshunna qooxeessu keere buuxisiisatenni borreessantanni noo jawaachishshanno gummara deerru deerrunni noo massagaanonna qeechi luphiima ikkinotano egensiise pirezidaantichu; loonsoonninna loonsanni hee’noommo gummaamu latishshu loossa aana tuqu dagitte tuqu xaadooshshi duduwinni su’ma huntannori eemarantanno gedeno sokkasi sayisino.
Abbebech Maatewoos
Bakkalcho Badheessa 11, 2017 M.D
