Addis Ababa:- Hookkote woradira ijaarshinsa uurre keeshshino pirojekitubba hanafisiinsoonnita woradu gashshooti xawisi.
Hookkote woradi qaru gashshaanchi kalaa Deggife Shubbannihu Itophiyu pireesete uurrinshara xawisino garinni; woradaho danchu gashshooti xa`mubba dawaratenna daga owaantete horaameeyye ikkitanno gede assate ijaarshinsa uurre keeshshino haammata pirojekitubba hanafisiinsoonni.
Woradaho 2008 M.D kayse babbaxxino korkaatinni hanafante uurritino pirojekitubba mereero kaameelu hoowe, gashshootu ijaari, rosu mininna dagate hari afamannota coyi`re; tenne pirojekitubba hajo la`annonsa mootimmate bissa ledo qinaawatenni harancho yanna giddo gumulantanno gede assate looso kaajjine loonsanni hee`noonni yiino.
Tini pirojekitubba woradu gashshooti qoqqowu mootimma ledo halamatenni gumulannota ikkase kalaa Deggife buuxe; konni alba hanafante uurritino pirojekitubba harancho yanna giddo jeefisante dagate hasiissanno owaante uytanno gede sharrammanni afammannita xawisino.
Woradaho baatooshshu korkaatinni daga sumuu yitukkinni keeshshinohu doogote latishshi ijaarshi hajo la`annonsa bissa assitanno irkonni harancho yanna giddo gumulamanno yitanno ammano noositano buuxisino.
Kalaa Deggife pirojekitubba uurrite keeshshansa danchu gashshooti qarra ikkinota qummeesse; daga hasidhanno bikkinni afidhanno owaante injiitinota ikka hasiissannota coyi`rino.
Pirojekitubbate jeefisama seeda yanna keeshshitinore dagate latate xa`mubba dawaratenni sa`e baxxinohunni rosu mini rosaanotenna rosiisaanote injiino akata kalaqanno yiino.
Abbebech Maatewoos
Bakkalcho Badheessa 4, 2017 M.D
