72ki Booranu Abbaa Gadi billoonye Abbaa Gada Guyyo Booru adhino.Abbaa Gada Guyyo Boru billoonya adhi yannara xawisino garinni; Gadu balchoomi garinni Debele deerrinni kayse babbaxxino gari giddoonni sa’’atenni Kura Jaarso Booranu Abbaa Gada Baalli (billoonye) adhoommo. Gada amanyootinna Gadu giddo afantanno balchoomma hundi Abbaa Gadooti duucha waaga baatte techo ilamara sa’’anno gede assansa xawise; hundinkerinni balchoommanke agarre adhinoommonte gede sufisa noonke yiino.
Abbaa Gada Guyyo Boru billoonyu yannasinni dagate mittimma kaajjitanno gedenna keeru geanno gede jawaantetenni loosannota qummeesse; ledotennino safote latishshuwa halashshatenna woloota hajubba aana illachunni loossannota leellishino.
Gashshootisi yannanni mittimmanna keere buuxisatenni dagatenni uynoonnisi yawo fulate qixxaawinoha ikkasi xawisino.
Budesi egensiisatenni hundi balchoomisi widira higanno gede Abbaa Gadootunna mootimmatenni assinanni hee’noonni hixamanyera galatino. Aantino yannarano mootimma irkose sufisiissanno gede xa’me; ilamano rosunni irkisantanni budesenna wogase tareessotenni aantino ilamara saysate ragaanni umise qeecha fula hasiissannota xawisino.
Gadu amanyooti Oromote ledo heedhanno daganna olliise ledo keerunni hee’rate balchooma kaajjisha hasiissannosita qummi asse; ilamano mootimmatenna Abbaa Gadootu midaadoonni uurratenni budese aantino ilamara saysate umise dilaala assitanno gede woshshatto shiqishino.
Mootoonsate amuraati aana leellinohu Oromiyu Qoqqowi Pirezidaantichi Kalaa Shimellis Abdiisa isi widoonni; Ilama yanna agarino garinni woganna budese agarte sufisiisa hasiissannose yaanni xawisino.
Pirezidaantichu Kalaa Shimellis Abdiisa 72ki doyicho Booranu Abbaa Gada Baali (billoonye) aanna adhate amuraate Soojjaati Booranu Zoone Areero Woradi Arda Jiila Bedaasa harinsi yannara xawisino garinni; Gadi amanyooti sannate busullete ha’rinsho baalantenni umosi haaroonsanninna jifubba sa’’anni tennera iillino yaanni xawisino.
Gadu amanyooti dagate budinninna balchoommanni suwenna ha’rinshotenni xaaddino mitiimmuwa xiinxallote taashshatenni techora iillino yiinohu pirezidaantichu; Ilama yannate garinni wogasenna budese agarte sufisiisa hasiissannose yiino.
Sayinsenna tekinoloojete rosi ijaarshino dagate budenna dhagge kaima asse sufannota xawise; ga’anke ijaarreemmohu budenna woganke garunni awuutanna boowirsa dandiinummorooti yaannino xawisino.
Qoqqowu mootimmano konne kaima assatenni rosu amanyootinna tekinoloojete ijaarshi hattono dagoomittetenna ikonoomete latishshi ha’rinsho giddo dagate budenna woga kaima assite loossanni noota coyi’rino.
Qoqqowu mootimmano Gadi amanyoote ilama rossanno gedenna kalqete egennamanno gede kaajjishshe loossannotano leellishino.
Pirezidaantichu; geegiissamaanchunna adhi Abbaa Gadootira hawalle iillishi’ne yiino. Olliicho gobbuwanninna olliicho qoqqowuwanni amuraatu beeqqora daggino beeqqaanorano galata shiqishino.
71ki doyicho Abbaa Gada Kura Jaarso 72ki Abbaa Gada Guyyo Boru Guyyora billoonyesi uyno.
Amuraateho Keeniyu Soqqamaano Gaamo beeqqo assitinoha ikkanna Keeniyaho Maarsabeeti Kawunti Gashshichi Mehaammedi Ali saysino sokkanni ‘’techo barri hagiirru barraati; ninkeno roduuwinke hagiirre beeqqate dangoommo. Booranu daga ledo farote badooshshi ikkinnina budunna dhaggete badooshshi dinonke’’ yiino.
‘’Gadu amanyooti biifado budenna hundi demokiraasete amanyooteeti’’ yiinohu gashshichu; konne biifado bude agarte keeshshiishshino bissa galatino.
Demmellaash Demmeqe
Bakkalcho Badheessa 4, 2017 M.D
