Addis Ababa:- Hawaasi Quchumira 85% ikkitanno qooxeessuwa hobbaatu kaameerinni qorqora dandiinoonnita Quchumu keerunna ga’labbote biddishshi xawisi.
Sa’u lee agannara kaameeru illaallishshinni babbaxxitino jaddubba gumultanni afantinori 174 jaddaaleeyye seeru qorqorshi hunda hosansano kulloonni.
Hawaasi Quchumi keerunna ga’labbote biddishshi sooreessi kalaa Wondimmu Torba Itophiyu Pireesete Uurrinshara egensiisino garinni; quchumu gashshooti Federaalete kaa’lamaano uurrinshuwa ledo halamatenni quchumu qooxeessuwara 85% ikkitannoti kaameeru illaallishshi giddo ikkitanno gede assino.
Qara qara doogga aana hobbaatu kaameerra kaasatenni tekinoloojetenni irkisamino loosi loosamanni noota xawisinohu sooreessu; sa’u lee agannara babbaxxitino jadduwa gumultanni afantinori, jaddo gumulate wo’naaltinorinna jaddo gumulte maaxantinori 174 jaddaasine hobbaatu kaameerinni qorqorshu hunda hosiisa dandiitinota xawisino.
Latishshunna danchu gashshooti xa’muwa dawarate, qansootunnita mannihimmatenna dimokiraasete qoossuwa agarsiisate keeru jawa qeecha afi’rino yiinohu Kalaa Wondimmu; qoqqowu mootimmanna keerunna ga’labbote biddishshi tenne hegersatenni dagoomu ledo shiqe loosanni leellanno yiino.
Keerunna ga’labbote loosi dagate beeqqo nookkiha ga’labbote bissanni calla gumaamo ikkannokkita leellishinohu sooreessu; keerenna ga’labbo geisate looso dagittenniha assatenninna dagate ledo loosate widoonni haammata loossa loosamansa xawisino.
Sa’u lee agannara hobbaatu kaameerra kaa’lonni mooru, mulqi’ranna kaameelu dano iillishshe xooqate wo’naaltinori xaphoomunni 174 jaddote gumulaano qorqorshu hunda hosiisa dandiinoonnita Kalaa Wondimmu xawisino.
Hobbaatu kaameerra jadduwa gumulantanno woyte dargaho noonte gedeenni amadate, la’nikkinni gumulantino jadduwano hattonni assootu gumulaanchi qooxeessunni xeerti’rikkinni rahotenni qorqorshu hunda hosiisate dandiisiissannore ikkansa coyi’rino.
Roorima quchumu qooxeessubba hobbaatu kaameeri qorqorshi hunda assatenni jaddo woyyaabbino doogonni gargadha dandiinoonnita egensiisinohu Kalaa Wondimmu; quchumaho keerenna ga’labbo geisate loosi loosamasinni xaa yannara giddosi heedhanno teessaanorano ikko daa’’ataanote bidhatto ikkannori nookkita qummeessino.
Quchumu hobbaate roorenkanni agarate; quchumaho afantanno uurrrinshuwa baalanti uminsaha hobbaatu kaameera qasidhanno gede sumimmete aana iillinoonnitano egensiisino.
Demmellaash Demmeqe
Bakkalcho Badheessa 4, 2017 M.D
