Addis Ababa:- Sai bocu dirinni mussinnunni awaawuraminoha 17 miliyoone birra qolsiisa dandiinoonnita Sidaamu Qoqqowi Farcote Biiro egensiissu.
Qoqqowu Farcote Biiro Sooreessi Kalaa Mato Maru Itophiyu pireesete uurrinshara xawisino garinni; sai umikki bocu dirinni soorronnita reekkote mixo garunni loosu aana hosiinsoonni.
Farcote amanyooti gummaamimma isilancho assate loossa xibbuunni 99.08% gumula dandiinoommo yiinohu kalaa Mato; Kunino, buuxo gundeenna Seeru Allaalshira daggino mazigabba wo’munni wo’ma yinanni garinni owaante aa dandaankenniiti yiino.
Yoote mine gumulo afidhino fayillanni 97% ale ikkitannore hunaanote yine qorichishiinshoonnitano qummeessino.
Qoqqowoho mussinnu jaddo gargaratenna hasiissanno farco aate jawa illacha tunge loonsoonnita kulinohu Biirote Sooreessi; sai bocu dirinni mussinnunni awaawuraminoha 17 miliyoone birra qolsiisa dandiinoonnita egensiisino.
Fitaabeerete seerinni mootimmate horo agarsiisate ragaannino 46 miliyoone ale birra mootimmate eo assa dandiinoonnita coyi’rino.
Wole ragaanni, danchu gashshooti loossara irko ikkitannore, qoqqowoho mootimmate loossara ikkitannore babbaxxitinota 17 seerubba fushshine kaajjinshoonnitano hattonni.
Sai dirinni hananfe dagooma beeqqisiisinoha farcote amanyooti woyyeesso harisatenni farcote amanyooti qarrubba badate dandiinoonnita kaysino.
Biirote Sooreessi Kalaa Mato xawishshi garinni; farcote amanyooti owaante uynanni harinshonni loossansa garunni gumultannokkire, muishshunna bainchu assootinni angansa wodhitino ogeeyyenna massagaano badate loossa loonsoonni.
Farcote uurrinshubbara calla 142 ale ikkitanno ogeeyyenna massagaano aana qorophishshunna Seeru Allaalshi gashshooti songonninna uurrinshate gashshooti garinni qorichishantanno gede assinoonni.
Kuri mereerinni 59 ikkitannori Farcote Biironni xa’mamaano ikkitanna; 39 hunaano ikkatenni loosunni geegeessantannonna qorichishantanno gede assinoonnita qummeessino.
Amsaalu Felleqe
Bakkalcho Badheessa 4, 2017 M.D
