Addis Ababa:- Ogimma hegeraamo miinja kalaqate waalcho ikkasi Loosunna Ogimmate ministircho Dukko Muferihaat Kaamil xawossu.
Ministircho tenne yitinohu layinki foolishsho sayikki doyicho “Itophiyu Daafira” yaamantino barera “Ogimma Itophiyu daafira” yitanno hedonni Addis Ababaho IFDR Tekiniketenna Ogimmate Uurrinshara harinsoonni bareraati.
Ministircho Muferihaat Kaamil tenne yannara xawissino garinni; ogimmate handaarira jawa ayirrinye uyne loosa yanna uynannikki hajooti.
Ogimma babbaxxitinota laashshaanchimmate qarrubba tirtannota ikkasenni hasiissannota mannu wolqa qajeelsine qixxeessate laashshaano Industirra ledo qinaambe loosa agarranninke yitino. Qinaambe gobba lossateno ogimma bowirsa hasiissannotano xawissino.
Seekkine awuuntammoranna agarooshshe assa hasiissannonkeri ha’nura egenno noota xawissinoti Ministircho; 26 ikkitannota ha’nura egenno badatenni haaru rosu budinni hanqafantanno gede assinanni hee’noonnita egensiissino.
Aanteteno, ha’nura egenno woyyeessatenni ogimmanna ogeeyye ayirrinse gobbate lophora qeechansa fultanno gede assa agarrannita kultino.
Haaronna galo daddalu loossa qineessanna hanafaano loosu kalaqaano dhuka kaajjisha hasiissannota kulte; Itophuya lossa hasiisiro loossa ogimmatenni massagama nooseha ikkasinni noonke egennonna ogimma mucci assine horoonsi’ra agarranninke yitino.
Qajeelshunni afi’nanni egennora ledote rosichunni egennonna ogimma noonsa mannira afamishsha aate amanyoote kalanqannitano qummeessitino.
Gobbate lopho buuxisiisate ogimma jawa qeecha afidhinotano ledde huwachishshino.
Barete hasaawu borro shiqishinohu Loosunna Dandoote Ministere Dieeti Teshaale Berreecha (Dr) isi widoonni; ogimmansa bowirsidhino qansoota Industirrate shiqishate loosi hasattote garinni kaajje gumulama noosi yiino.
“Jireenyu harinshonke timo gantanno gede ogimmate handaari noosi qeechi luphiimaho’ yiinohu Dieetichu; ha’nura gobbate miinji woyyeesso loosu aana hosiisa hananfi kawa miinju miinju hiiqqamme sissate dandiisiissannora ogimmatenni massagantanno gumulkloonnitano xawisino.
Hallanyu handaari qajeeltino mannu wolqa shiqqo ragaanni qeechasi fulanno gede assateno babbaxxitino qaafubba adhinanni hee’noonnitano kulino.
Ogimmate hayyote qajeelshi akatisinni loosunni leellinshanniha ikkasi kayse; ikkadda mannu wolqa egennotenni, ogimmatenni, woyyaabbino hedonni kakkaooshshu noonsare assine qixxeessa agarrannitano qummeessino.
Qajeelshu isilanchimma agarsiisatenni hasi’nanni ogimma noonsa qansoota kalaqate Industirratenna qajeelshu uurrinshubba qineessate loonsanni hee’noonnita kule; ogimmate uurrinshubbara harancho yanna qajeelshinni 3 miliyoone ale qansoota; uurrinshunni kayinni 500 kume qansooti sa’annota qummeessino.
Amsaalu Felleqe
Bakkalcho Badheessa 4, 2017 M.D
