Itophiyu afamino qolchanshote Ispoorte sa’u lamala jeefora hadhino heewubbanni dhaggete qeelle borreessiisa dandiitino. Tookkiyote hadhanni noo Paara-olompiikete heewora dhaggete umiha ikkinohu culku meedaaliyi borreessamino.
Wole widoonni Aliyye Aayeerilaandera hadhino doogote aani qolchanshora seennunni boco maaratoone Qolchamaancho Atleet Yaalemizerf gedensi kalqete ayirrinyu danna angasera eessidhino.
Olompiike gumulantu gedensaanni aante hadhanno Paara-olompiikete heewubba aana Itophiyu beeqqa hanaffinohu Awuroppu kiiro garinni 2022 hadhino Lendonete Olompiikera ikkanna; hatte yannara mitto birru meedaaliyaati afidhinohu. Aante hadhino Riyoo-olompiikerano hattonni birru Meedaaliyi borreessaminoha ikkanna naaxxissanno beeqqono assate dandiinoonni. Gobbate sayikki beeqqo ikkitino Tookiyo Olompiikete qole haaro dhagge borreessantanno assino dhaggete gumi borreessamino.
Fanote barrinni hanafe Itophiyu woga egensiisate danchu amanyootinni ijaartanni afantanno gaamo heewubbatennino hagiirsiisanno guma borreessiissanni no. Shoolki shoolki diro hadhanno Olompiikenni taalu deerri noo Paara-olompiikete heewo Itophiyu dhaggesenni umi culku meedaaliya borreessissinoha ikkanna Atleet Tigist Gezzahanyiti dhaggesenni culku meedaaliya lukkino. Tenne heewo aana caakkeessite la’annori 1500 meetire heewora beeqqitanno tole meyaa Qolchamaancho Paara-olompiikete fanote barra gobbase baandira amadatenni gaamo massagase qaangannite.
Qajeelshaanchu Nigaatu Habtemaariyaamihunni qajeeltanno qolchamaancho layinki doychonni hanaffe heewo kaajjishshe doddinoha ikkanna; jeefote doycho aanano Morokte qansite heettisamaanchose lowo fanfenni hunte eatenni gobbasera qeelle borreessiisate dandiitino.
Maala’lisanno dhuka leellishatenni qeeltinoti 21 diri qeedhitte Qolchamaancho qolchansho qeeltino saateno 4:23:24 saate ikkite borreessantino. Tenne fanfenni seennunnu amadamino ayirrinyu Danni 4:05:27 saate ikkitinota mashalaqqubba leellishshanno.
Paara-olompiikete meedaaliyu batinyi deerru shae doordhate aana afantannoti Chaynu, xaa geeshsha 119 meedaaliyuubba umiseta assi’rate dandiitino. Aantitte gobba Ingilize 64 meedaaliyubba borreessiissanna, Ameeriku qole gamba assitino 46 meedaaliyubbanni sayikki gobba ikkitino. Mittu culku meedaaliy noose Itophiy qolte 45ki deerrira ofolla dandiitino.
Sase qolchamaanonni riqiwaminohu Itophiyu umikki meedaaliya Qolchamaancho Tigistinni borreessiissanna; 1500 meetirenni qumulote iillinohu Qolchamaanchu Ammenu Gemmechuhu dippoloomu anna ikkate dandiino.
Kalqete qolchamaanote afanshinni hadhanno Antiriimikosti doogote aani heewono Itophiyu ayirrinyunni woshshantino wole sewoo kuussino. Aworoppu gobbara hadhanno tenne heewo aana boco maaratoonera beeqqitino Qolchamaancho Yaalemizerf gedensi fanfe kalqete jawaata meyaa qolchamaancho assitannose qeelle borreessiissino. Qolchamaancho ayirrinyu danna angasera eessidhinohu 18 xiqqeessa woyyeessatenni ikkanna; 1:03:44 ikkitino saate haaro e’inote.
Kalqete ayirrinyu Danni borreessamino ontu agani albaanni saatete ama Ruuti Chipigetichiti fanfe gumulate adhinosehu 1:04:02 saateeti. Hatte yannara hadhino heewubba Keeniyu qolchamaancho harunsite e’inoti Yaalemizerf 1:04:40 ikkitino saatenniiti. Agannate gedensaannino umise saate mittu lipheessi ale rakke eatenni jawaata qolchamaancho ikkate dandiitino.
Qolchamaancho dhaggeeffachishshanno garinni onte kiilomeetire qeeltinohu 15 lipheessi giddo ikkanna; 10 kiilomeetire doddinohu qole 30 lipheessinniiti. Aanino 15 kiilomeetire 45 lipheessinni doddu gedensaanni rankese ledatenni 21 kiilomeetire 1:03:44 saate dodatenni fanfete jeefote xuruura kadate dandiitino.
22 diri qeedhitte qolchanshote gedensaanni uytino hedonnino “kuni ajuuja’ya gumu’loomma gumaati. Konni albaanni lame hige kalqete ayirrinyu danna hiiqqate dudummarono di-ikkinoe. Xa kayinni ikkinoe daafira hagiirraamete” yitino. Qolchamaancho konni albaanni harinsoonni kalqete boco maaratoone shaampiiyoona camote meedaaliy baraaraancho ikkitanna; Riiyo-olompiikera gobbase 10000 meetirenni riqibbe qacce iilliturono filotenni balaxamasenni gaamote miila ikkate dandiitino.
Bakkalcho Woxawaajje 27/ 2013 M.D
