Itophiyu Atleetiksete federeeshiine 28ki uurrinshu xaphoomu gambooshshe albiidinke Qidaamenna Sambata harissanno. Xaphoomu gambooshshinni aantino shoole dirrara federeeshiine massagganno loosu gumulsiisaano komitenna pirezidaante doorranni. Doorshaho heewisamate shiqqinore goofimarchu heewisamaano federeeshiine tenne lamala giddo egensiissino.
Konni alba qoqqowubbanna quchumu gashshootta doorshunni heewisantanno riqiwamaanonsa egensiissinoha ikkirono federeeshiine hasiishshu garinni buuxxe hasiissanno yitinnore goofimarchu heewisamaano egensiissino. Konninnino Pirezidaantetenna loosu gumulsiisaano heewisamaano aana konni alba xawinsoonni soorro assinoonni.
Federeeshiine qoqqowubbatenna quchumu gashshoottanni shiqqino heewisamaano Bocaasa 17, 2017 M.D faajje assitinnoti qaangannita ikkitanna mite mite qoqqowubbara shiqqino heewisamaano hasiishshu garinni ispoortete maate hasaawissanni keeshshitino. Sa’u barrubba giddo federeeshiine seerunna wodhote garinni hasiishshu aana hasiissanno buuxo assituhu gedensaanni goofimarchu heewisamaano egensiissino. Konninnino mite mite soorro hee’rase xawo ikkitino. Pirezidaantete doorsha harunsite konni alba noo lamala heewisamaano mereerinni mittu qoqqowi shiqishino riqiwamaacho ajinsheenna loosu gumulsiisaanchimmara heewisamannota afate dandiinoonni. Loosu gumulsiisaanchimmara assinanni heewonnino gama heewisamaano aana soorro assinoonni.
Konni alba babbaxxitino kalqoomu heewonni gobbansa woshshiisha dandiitino Atleetootinna ispoortete ogeeyye gamba yitino pirezidaantete doorshi heewo aana doorshaho shiqqinori mereerinni mittu Atleet Gebre Igzaabeer Gebremaariyaamiho. Tigrayete qoqqowinni riqiwaminohu Atleet Gebre Izabeeri; konni alba Atleetootu riqiwamaanchimmanni hattono federeeshiinete layinki pirezidaante ikke owaatinoti qaangannite. Barrubbate gedensaanni harinsanni doorshinnino marro federeeshiine massagate heewisamaanchimmate shiqanno.
Oromiyu qoqqowinni heewisamaanchimmate shiqinohu Atleet Sileshi Sihinihu lawanno garinni gumaamu qochanshote rosichinni sainohunni Itophiyu Atleetooti maamari pirezidaante ikkatenni owaatinoha ikkanna xa kayinni federeeshiine pirezidaantimmatennii massagate heewisamanno.
Addis Ababu quchumi gashshooti heewisamaancho asse shiqishinohu Kalaa Dubbe Jilohu seeda dirra kiirsiissino Atleetiksete ogeessaanchimmasinni massagooshshunni sufate heewote giddo hanqafamino. Albihu Amaaru qoqqowi Ispoortete komishinershi kalaa Yaayyeh Addisihuno Ispoorte massagate qoqqowisinni riqiwamino. Callicho meyaa pirezidaantete doorshi heewisamaancho ikkite shiqqinoti Risaal Upiyew kayinni Gaambeellu qoqqowo riqibbinoha ikkanna wodiidi Itophiyi qoqqowino komaander Girma Daabaha shiqishino.
Konni alba pirezidaantimmate heewora Diredaawu quchumi gashshooti heewisamaancho ikke shiqinohu Injiner Geetu Gerremewuhu xa loosu gumulsiisaanchimmanni heewisamanno gede assinoonniti batinyootunniwa xa’mo kalaqqino. Itiyo-Elektirikete Atleetikse gaamo boorde massagaancho ikkinohunna Ispoortete luphiimu baxilli noosita konni alba loosunni leellishinohu kuni heewisamaanchi federeeshiine xawissinokki korkaatinni loosu gumulsiisaanchimmara heewisamannota egensiissino. Diredaawu riqiwotenni pirezidaantimmate wole heewisamaancho shiqishinokkita buunxoonni.
A.K.G 2022 Yuujine kalqete shaampiyooni 3 kume meetire gufichu heewonni birru meedaaliyi qeelaancho Atleet Worqwuha Geetaachewuti gumulsiisaanchimmate heewisantannota xawinsoonni. Xeertinyunni Afriku shaampiyooninna dayimende liige qeelaancho ikkatenni Itophiyu lowontanni afaminokki xeertinyinni xabbe leella dandiitino wedellitte Atleetitte ikkase anfoonnite.
Lawanno garinni loosu gumulsiisaano heewisamaano aana gama soorro leeltinoha ikkanna seeda yannara Itophiyu Atleetiksete federeeshiine borro mini sooreessa ikkatenni owaatinohunna soqqanshote yannasi jeefise fooliishshote aana noohu hattono babbaxxino ispoortete maamari loosu gumulsiisaanchimmaranna yawo aana loosinohu Amaaru qoqqowi riqiwamaanchi kalaa Bililliny Meqoyyahu heewote shiqino. Isi dargano Zelaalem melkaamuhu (Dr) shiqino. Hiitto heewisamaancho egensiisinokkihu Somaalete qoqqowi kayinni Kalaa Abdi Mehammedihanna Ifreh Mehammediha(Dr) riqiwino. Sidaamu qoqqowi kayinni kalaa Firewu Areeriha kalaa Asraat Asaffihunni soorrino. Mereerimu Itophiyi qoqqowi dukko Amlaaz Gaammeta loosu gumulsiisaanchimma heewora shiqishino.
Qiddist Gezzaheny
Bakkalcho Sadaasa 10, 2017 M.D
