Itophiya kalqete luphi asse leellishino ispoortete handaarinni Atileetikise mitticho tokkicha kaayyooti. Jajjabbu atileetooti kalqete barera Itophiya techo geeshsha su’mase woshshiishshanni afanto ikkinniina muli dirra kawa Atileetikisete Ispoorte handaarinni Itophiyu woffiima guma maareekkisiisanni dayno. Konnira kayinni Atileetikisete federeeshiine pirezidaantootinna luphiima massagaano hemantanno.
Heme gatisate ikkikkinni,Itophiyu su’ma Atileetikisete dhaggenni wirro albisa assate ayi dooramakka? Yine hexxinanni pirezidaantootu doorshi iillasi digattinona sa’u lamalara ikke sai.
Atileet Sileshi Sihini Itophiyu atileetiikisete federeeshiine pirezidaanticha ikkatenni owaatanno gede dooramino. Sa`u lamala giddo lame barrubbara Addis Ababaho harinsanni keeshshinoonni 28ki Itophiyu atileetiiksete federeeshiine uurrinshu xaphoomu songonni albita bareeda atileeticho Meseret Deffaarita lede wolootta federeeshiine aantaano shoole dirrara massaggannore haruudde loosu gumulsiisaano komitete miilla dooratenni jeefinsoonni. Kuri lamunku jajjabbu atileetooti jawa gobbate yawo adhite aantete shoolu diri giddo abbitanno gumi hexxotenni agarranniho.
Federeeshiine pirezidaantichimmatenni massagate lee qoqqowubbanninna lame quchumu gashshoottanni shiqqino dooramaano doorshunni heewisantinoha ikkanna; Oromiyu qoqqowinni atileet Sileshi Sihini 26 huuronni 11 afi’ratenni qeela dandiino. Aantaano shoole dirrarano Itophiyu atileetiikise massagannoha ikkanno.
Albi federaalete seejjote mini atileetichi Sileshi Ateensinna Beejiingete olompikubbanni 10 kume meetire heewonni birru medaaliyubba gobbasira borreessiisinoti qaangannita ikkitanna; Paariisete, Helsiinkinna Osaaku kalqete atileetiikisete champiyoonubbannino 3 birrunna 1 nehaasete medaaliya lukinoti qaangannite. Ledotennino mereerimu xeertinyinni 3 kume meetire, seedu xeertinyinni 5 kumenna 20 kume meetire; 10, 15nna 20 kilomeetire doogimaru aani dodanshubbanni; gobbate taysaanchonni, boco maaraatoonenninna maaraatoonete heewubbanni 15 dirra ale heewisamatenni gumaamo ikkinoho.
Sileshi Sihini atileetimmate harinsho uurrisihu gedensaannino albi kilawesi hattono Itophiyu atileetooti maamarira pirezidaantichimmatenni owaata dandiino. Atileetichu noosi seeda yanna atileetiikisete heewo rosichinna danchummasinni kainohunni Itophiyu atileetiikise xaaddinose hiiqqamme sissatenni albi bareendewa qolanno yine ammannoonni.
Xaphooma songo jeefo aana sa`u sette dirrara federeeshiine pirezidaantichimmatenni massagatenni owaattinoti geegiissamaancho kaa`laancho komishiinercho Deraartu Tulluta lede atileetiikise owaattinori loosu gumulsiisaano komitete miillara tajete woraqata boraarsinoonninsa. Afanshano IFDR budunna ispoortete ministere ispoortete latishshi handaari ministir dieeti Kalaa Mekiyyu Mehammed barete afame baraarsino.
Ledotennino Addis Ababu quchumi gashshooti ispoortete biiro quchumu atileetiikisete federeeshiine ledo ikkatenni hattono Itophiyu atileetiikisete federeeshiine borro mini loosaasine bareeda atileeticho ispoortetenni baraassino qeechira galatu baraarsha baraassino.
Injiiner Geetu Gerremewu, Biniyaam Miruuts, Adimaasu Saaji, dokiter Tizaazu Mose, Atileet Meserete Deffaar, Saara Hasen, Abeba Yooseefinna dokiter Ifireh Mehammed doorantino. Ledoteno xaphoomu songo albi loosu gumulssiisaano miilla lede kaa`laancho komishiinercho Deraartu Tullu, kaa`laancho komishiinercha Maarqoos Gennete, Fooziya Heseninna atileet Messelech Melkaamuta ayirrinyu miilla assatenni hanqaffino.
Pirezidaantichimmatenni aantaano shoole dirrara Itophiyu atileetiikise massaganno gede doorroonnihu atileet Sileshi Itophiyu atileetiikise massagate kaayyo afiroommohura galateemmo. Loosu gumulsiisaanonna hajo la`annonsa bissa ledo ikkatenni ispoortete lophora loonseemmo yeeno qaale e“ino.
Abbebech Maatewoos
Bakkalcho Sadaasa 17, 2017 M.D
