Abrahaam Saamueel
Addis Ababa:- Itophiyu Suudaanetenna Gibitsete ogeeyye Bayiriidi Itophiyu Haaroo`mate Kofatto laayinki doycho waa wonshate albaanni dagge towaattannonna la`anno gede koysa goofimarchu dipolomaasete harinsho ikkitinota Addis Ababu Yuniverstenni Poletiku saayinsenna Kalqete Xaadooshshi rosiisaanchinna Abbay Way Hajubba xiinxalaanchi Pirofeeseri Yaaqoob Arsaanohu egensiisino.
Pirofeeseri Yaaqoob Arsaanohu Bakkalcho gaazeexi ledo assinno hasaawinni yinonte gede, Itophiyu gashshooti Gibtsetenna Suudaanete ogeeyye haaroo`mate Kofatto way laayinki doycho wo`mara albaanni dagge la`anno gede koysa dipolomaasete ogimmanni la`niro dipolomaase gotti assate assinoonni ha`rinshooti. Dipolomaasetenni mucci assa goofimarchu guma kiirsiisate yiino.
Konni albaanni wirro hinge Gibtsennitinna Sudaanenniti ogeeyye, Ministeerensa hattono Suudaantete massagaanchi gatikkinni Haaroo`mate Kofatto noo base geeshsha marte la`anninna haruunsitanni keeshshitinota egensiisinohu Pirofeeserichu Yaaqoobi, lamente gobba ogeeyye Haaroo`mate Kofatto la”ate koysamansa haaro ikkitinokkita kulino.
Gibtsenna Suudaane Itophiyu loosanni noo Haaro`mate Kofatto aana maaxaminori no yite heddurono togoori nookkitanna Itophiyu albano looso xawo asse loosanni keeshshino; Xaano lamenti gobba dagge la`anno gede woshshatto assitino. Kunninnino Itophiyu albano maaxe loosanni nookkita xaano baalanka looso xawoho loosanni noota leellishannoho yiino.
Pirofeeserichu Yaaqoob yiinonte gede, Gibitsetenna Suudaanete Kofatto kaimisenni hanaffe loosantanni noote yine kullanninsa keeshshinoonni; kullinsa waro loosse di-dandiitanno yitanni keeshshitino. Kofatto goofa rakkuta qolte uurrisatenna loosante goofannokki gede gufisate looso loossanni leeltanno. Suffenno, Kofatto gooffanni noota affu gedensaanni illensa tugge maala`litanni la`anni keeshshitino.
Xaa deerrinni Itophiyu gashshooti Gibtsetenna Suudaante ogeeyye dagge la`anno gede koysanna fajja dipolomaasete ogimmanni la`niro Itophiyu dipiloomase lowo deerra iillishinota leellshshanno. Togo yaa ninke loosi xawoho reqecci yee noo loosooti yaate ikkinninna maanxe loonsanni looso ikkinokkita afate dandiinoonni.
Konni albaanni Haaroo`mate Kofattonni horaameeyye ikkitinota kullaninsa keeshshinoommo yiinohu pirofeeserichu Yaaqoob, Konnirano xa loosu goofanni notano di-maanxoommonsa yiino. Waa wonshate loosino yannasi agare albaanni amandoonni mixo garinni wonshinanni hee`noonnitano daggine lai`niro ninke widoonni mitiimma dinonke loosu baalu xawo ikkanno`ne yaankeeti yiino.
Haaroo`mate Kofatto ninkera horo aannoho yine kullanninsa keeshshinoommonte gede, lamente gaobbarano konni albaanni kullanni keeshshinoommonte gede, xaano la`anno gede koysa insano gawajjinannikkita xawo assateeti yitanno hedonniiti. La`u gedensaanni marte dagansara la`innore baala garunni kulte huwanyoote kalaqqanno gedeno hedatenni adhinoonni qaafooti yiino. Itophiyu tenne ha`rinshonni dipolomaasesi goofimarcho iillisha dandiinota leellishanno.
Itophiyu Bayiriidi Haaroo`mate Kofatto laayinki doycho waa wonshate albaanni Suudaanenna Gibitse mashalaqqe soorri`rate Kofattote Opireeterootansa uurrisidhanno gede woshshatto assinoonniti qaangannita ikkite, laayinki doycho waa wonshate loosino Maajanna Woxawaaje aganira wayi daanno gara la`ne bikkisi deerrinni Kofattote waa wonshate loosi Wocawaaro agani geeshshano sufara dandaanota buunxoonni.
