Hedeweelcho wodanu daafura yaa mayyaate?
Wodaninke kalaqamunni Ontenna hakkuyi ale ikkitinota irkisaano mundeete nigga afi’rino. Kuri mundeete migganni mitte woyi hakkuyi ale ikkitannotera mundeete du’nama amanyooti gufisameenna bocunni woyi wo’munni wo’ma cufantanno woyte; roore anga ge’ino mundeenni; wodanu amanyooti soorramanni hedeweelcho wodanu xisso kalaqantanno.
Malaatta
- Gagasu Huncuucama
Gagasu aana huncuucamate macciishshamme lowo geeshsha rosamino wodanu xisso malaateeti. Wodanu xisso ledo amadantinokkiti gagasu huncuucama wole korkaattanni kalaqantara dandiitannota ikkiturono; roore anga kayinni wodanu xisso malaateeti.
Hedeweelcho wodanu xisso kalaqamasera albaanni xissote macciishshamme hanaffannohu gagasunninna gurayidi qotinni kayisse cigilete, badhete, goowunna baqqaallu qooxeessinniiti.
- Buusano
Uurritannokki buusano woyi buunsanni yannara mundee karsino waangeeri hee’ra;
- Hawwu assa
Hedeweelcho wodanu xisso hawwu assate macciishshamme heedhanno gede assitanno. Hakkiinni sairo meessaneeto hawate geeshsha iillishshara dandiitanno;
- Daafuru
Wole yannanni baxxino garinni daafuru macciishshamme hee’ra aantino barrubba giddo hedeweelcho wodanu xisso kalaqamasera malaate ikkitara dandiitannohura xagisaanote amaa’la hasiissanno.
- Foolu ta’’a
Shota millimmonni luphiima foolu ta’’a kalaqantannoha ikkiro, shombu xissonni ledote wodanu xisso malaatta heedhara dandiitannohura shotinse la’’a dihasiissanno;
- Hunkiishsha
Ofollinoonniwa hunkuu lolaha hedeweelcho wodanu xisso malaate ikkitara dandiitannohura hegersa hasiissanno;
- Wodanu gana lexxa woyi sarraaqantinoti wodanu gana
Wodanu gana lexxa hawwu assate, daafuru macciishshammenna foolu ta’’a ledo amadante dagguro hedeweelcho wodanu xisso malaate ikkara dandaannohura fayyimmate xaawa ha’ra hasiissanno;
- Yaaddo
Kuni hegersinara hasiisanno hedeweelcho wodanu xisso malaateeti. Hedeweelcho wodanu xisso kalaqamasera albaanni waajjate macciishshamme heedhara dandiitanno;
– Wodanche!!
- S u k k a a r e t e xissamaano aana, dirunni jawoo’mino manni aana, meentunna Paarkinsene labbeemmeri nervete xissuwa noonsa mannooti aleenni xawinsirinni baxxino malaate leellishshara dandiitanno.
- Looqqi assa woyi sagalete hasatto aja
Looqqi assanna sagalete hasatto ajjinota ikka sa’e sa’e hedeweelcho wodanu xisso kalaqamara korkaata ikkitara dandiitanno;
- Saltote qooxeessira giirate macciishshamme kalaqantara dandiitanno;
Buuxotenni hiittoonni anfanni?
- Aleenni xawinsi malaattanni mittu nafa leelliro rahotenni fayyimmate xaawa haranna xaginaateho qoteho tenne buuxo assi’ra hasiissanno;
- Wodanu mikitanni kalaqantanno Inzayimma mundeete giddi bikka
- Wodana Altirasawundetenninna ECG buuxo assira qarunni kullannireeti
Xaginaatu maati?
- Hedeweelcho wodanu xisso xaginaatinni mittu mittunku xiqqeessi mikitate yinanni. Korkaatuno xaginaate wiinamunni assi’ni bikkinni gawajjantanno wodanu mikita bikki ajanno. Xissamaanchu lubbo gatate kaayyosi luphiimate. Konni daafira assi’nanni buuxonna ikkadda ikkitino uurrinshuwa ha’ra xaginaatu gummaa’mara jawa qeecha amaddanno.
Bue:-Dr Elias G. (Maya mereerima kilinke Hawaasa)
Qiddist Gezzaheny
Bakkalcho Sadaasa 24, 2017 M.D
