Mittu lame kifile rosanni noo qaaqqi maatesita xaphooma heeshsho gara – annunna ama mini giddono ikko gobbaanni loossanno, assitannonna ikkitanno gara xiinxallanninna daa’’atanni keeshshe huluullinosire xa’ma hasi’rirono; maatete giddo oosichu jawu manni (annunna amate) qotira leelle hettisamanni hasaawa fajjinannikki daafira qarrame ‘’hanqiniero hanqinoena’’ yaannoha lawanni, qacce qacce muranni barrunni mitto barra maatesi ledo assino xa’monna dawarote hasaawa konni woroonni shiqino garinni la’neemmo.
Qaaqqu: ‘’Anna, ani ate ayeennino roorse baxeemmohena ati kayinni mageeshsha baxattoe?’’
Annu: ‘’Daggu xaalla wore! Qaaqqo’ya techo tini hedo maminni, mayira dagguhekka?
Qaaqqu: (Hanqinosikkita afiti) Dagguwiinni daggona dawarolla qolissie; giwittoro ama’ya xa’meemmo; hanqattoe yeetilla wonanni ate balaxisiisoommohuna —.’’
Annu: ‘’Afoo amaxxe, hanni agarixa qaaqqo’ya amakki ledo macca iteemmona—; tee Dangiite daggu lame busha usuranna suta yinoonnina qaaqqu yiita macciishshitanni nootta? Mayyiinannikka?’’
Ama (Dangiite): ‘’Eewana, gu xaa ilamarana —! Maayye anfina hanni yaattore yiissisiyya’’
Annu: ‘’Ee anino seekke baxeemmohe la’ma’ya!
Qaaqqu: ‘’Konni ka’a anino lophummoro atente gede araddo corqeemmo, siixono siixeemmo? Ise corqineenna, siinxeenna maa- –maa yite coommitannoro woyilla afo! Anna dikulattoe!?
Annu: ‘’Cirate qo’likkinni, qaaqqo’ya agari ati xaara rosaanchohona.’’
Qaaqqu: ‘’Ati rosaancho ikkoottokkihuraati corqattohu, siixattohu; rosse egennootto?’’
Annu: ‘’Ee — kayinnilla—-‘’
Qaaqqu: ‘’Kayinnilla maricho —coydhe digudoottowe Anna!’’
Annu: ‘’Jaala ane! Kayinnilla ate geeshsha dirosoommo!’’
Qaaqqu: ‘’Ikkina rosu minira ha’ra’yara albaanni ati rosoottota mayira balaxxe rosiisa giwittoeyya?’’
Annu: ‘’Ani rosiisaancho ikkoommokkihuraatiwe, qaaqqo’ya!’’
Qaaqqu: ’’Sa’uwa amadattoena, sulchu annisira fule umo bokkote diyini! Anino atera fuleemmonso difuleemmo, tenne xa’molla jawaatte qolittoero gaccokki sunqeemmohe!’’
Annu: ‘’Oso’lanni — eewana woleho ayira fulattoyya!’’
Qaaqqu: ‘’Maahoyye hattootiro anino yannantenni araddonna siixo’ya hanafossiyya!’’ Rosiisaanchinke ‘’tambo siixa, araddo corqa, dimbissanno agatto aga, qaaqquulle quwansa saino looso loosiisa, meyaa beetto ofoshshiisha, wkl gawajjanno rosichooti’’ yaanni rosiisinonke daafira rosoommotanso ateta harunseemmoro leellantanni giwinoewe anera!’’
Annu: ‘’Baitto ane! Okkote — Okkote— maahoyyena rosiisaanchi’ne hakkuri kulittoere hedo yee calla gawajjitannoreeti yiinso mayira yiinoro kuli’ne?’’
Qaaqqu:’’Hashshu anna’ya! Wonankunni anilla xa’manni noommona hawalle atinni tenne wodani’ya giddo miqilaallitanni nooeta mamootinni mamoote fushshokka yaanni noommota coommado xa’mo xa’moottoehura xaano lede baxeemmohena dawaro’ya qaxaqqa’a yite macciishshie! Qixxaawoo!?’’
Annu: ‘’Eewana Ilamo’ya’’
Qaaqqu: ‘’Siixonna araddo fayyimma daaffanno (lawishshaho afalete, wodanu, shombu) dhibba abbitanno; qaaqquulle rosu mininni gatisanna quwa saino looso loosiisa bisinsanna tii’’insa aana jifo/qarra abbitanno – aneno layinkita jawu jaarkaaninni waaho sokkinoonte’’e, ayirrannae shetoommona! Konni garinni, ani atewiinni rose tambo siixanna araddo corqa rosa noo’eni!? Xa leellino’ne!?’’
Annu: ‘’Afitta Dangiite!
Ama (Dangiite): ‘’Maahoyye anfiwe; hoola dhaggete! Mitturichi qaccera hige gantorichino dinowe; qaaqqi’ya yiiri baalunkurichi yaannonte gedeetilla!
Annu: ‘’Tu—tu—lophi baa–baycho iillie qaaqqo’ya; ille hoolohe! Eewanni bushsha roso anina layinkita araddono siixono ane afiiranna sanora dila’’atto.
Demmellaash Demmeqe
Bakkalcho Sadaasa 10, 2017 M.D
