Billaallitino hedonni onkoleessa 20/1983 M.D Biilloonye qunxuuxxino TPLF, Itophiyu daga billaallissanni,babbaddanni,bebbee kkanninna, gosatenna gosate,dagatenna dagate mereero huluullamate danqara wore sai. Kuni assootisi techora kaa’lannoe yee hedote giddo worino junti techono hattenne hayyo horonsi’rate wo’naali.
Ikkollana di tolinosi. Mite mite hakkawari babbadooshshu poletika toonkoonninsari kayinni insa hedo haadhe haqaqqaalate wo’naaltanni afantanno. FB gaadaano yaate.
Coyinke aana cancu mooraanchoho injaannowe. Gobba hembeelantanno wote umisi horora dodamannohu me’eho? Tenne busha yannara nafa ola dago assi’re gidu aana waaga ledinohu me’’eho? Tenne shiima diro hee’nannitera reyinohu jajja mulqi’ranni noohu me’eho? Dallaa!
Coyi’ya gumiwa higummoro, Juntu hedinoti Itophiya billaallisate. Juntu hexxo 100 dirira ayimmatenna mayimmate xa’mo xa’mi’nanni mimmito itammanni hee’ratenkanni. Ikkollana diinu daanno wote giddota giddo amaxxe diina shore higanno Itophiyu manni babbadamooshshenna giddo xa’mo boqote amade diinaho alba higasi diinaho umu damuume ikkituwe.
Faarsaanchu togo yino:-
“isi hedo ikkitoommero
Hedosi baala wo’miteenna,
Kawoote bi’renni hamboyie,
Ani bire birenni reenna’’
Diinu hedo Itophiya sooriya assate;diinu hedo Itophiya billaallinse gobbayidi xagaraano kadde gashshitanno gede assate. Oye hoolonsana uyite ho’litanno poolisenna gashshootu seera fushshite “umosi dandaannoohu umisi umosi gashshanno qoosso agarantinote” yite “qoosso baxxate geeshsha” yite surkitino Quwa 39 daganna dagooma billaallisate wortinohonna techo Tigirayete daga Itophiyunni badate wortinoha ikkasi buuxissanni afantanno. Konnira wole naqaashe di hasiissanno. Beronna oyimbarra juntu dooggatenna minnate aana “Tigiraye Itophioya dikkitino” yitanni borro xallitanni afantanno. Geetaacho Raddihu hedosi Itophiya billaallisa ikkinniina wirro Itophiya gatamaranna ikkinokkita saalannokki afiinni Tuqu xaadooshshira coyi’rino.
Kaimisi babbadate. Jeefosino Itophiya diige diinaho sayise aate. Tigirayete daga wolasseemmo yaanno Debre Tsiyooni 27 diri giddo Tigirayete daga Seeftineetete irkonni sa’u yannara hiitte bale ittinosi? Tigirayete daga kaa’lote bulleenni heedhannota afinohu 4 kiilonni xooqe maaxami gedensaanni codhino gidi goofita dubbu giddo hee’reeti. Xaano albano Tigirayete amuwwi di wolaphino. Tigirayete qaaqquulli olaho gaadanni no.
40 diro dargete ledo assitino oli yannara oosonsa gabbartu amuwi xooraahanna irkisaaha hoogge hudetenni gooffanna insa maate New Yorketenna kanaadaho rosiissanni sa’ino. Juntu gaamo Wuske dirrissanna Tigirayete daga moolle qamassino. Olu yannara lekkansa hoogginori mitu bushshu giddora higginoha ikkanna mitootu huucci’raano ikkitino.
Darge ledonsa qeeltinori,qeelle daggara Oosichonsa gabbartino amuwi mullawa gattino. Techono Tigirayete dagara qarraminoha lawe Afoo busulse Tuqu xaadooshshira “Tigirayete daga labballu… xaano anga di uyineemmo “ yaanni hecheemmo kadanni qaaqquulle urdete sonkanni gede kakkayisannohu ayerano elinokkitanna elannokkita Tigirayete ama baqqi yaa hasiissannonsahu techooti!
Getacho Raddihu oososi gobba wore aye ilaa Tigiraye woxxito yaanni awaawurannoro mayira deantu Tigirayete daga!? Sibaati Naggihu umosi baxannota qaaqqosi kakkale anga uyita mayira deammi. Ikkireno ikkeenna diinu hedinori bacate. Kaaliiqi gashshooteho xircho oyenna;dagate mittimma kalaqeenna techora iillinoommo. Juntu gede Ikkoommero Wocawaaro 30/2012 M.D gedensaanni Itophiyu gashshootu nookki gobba ikkiteenna diinu horrannonkanni. Techo Itophiyu TeleviZhiinetenni la’neemmo sooriyanna Liibiya ikkiteenna qansootu billaallannonkanni. Ikkollana Itophiyu daga leellishshino mittimma Gobbanke woxxitu. Soodara yiiro Tunsanno!
Haruu diri Itophiyu wolaphonna keere lallambeemmoha ikkonke!
Yaareed Geetaachew
Bakkalcho Woxawaajje 20/2013 M.D
