Xirchunni allagga gudda,hirphunni baatto milli assa Sidaamu dagara haaroo dikkitino. Gaacheenisi diina shore gobba keere assanno. Maassosino Rumosino uulla cophi di yitanno. Gobbate elannokkiha “teessooti;Algu so’moonkehe, barcimu eloonkehe”! yitanno. Kunino uulla uwikkinni elannokkiha, dagate danqara ikkinoha albiidinni hoolanna la’a haaroo dikkino. Konni afiinni Junta runtino.
Gobbate elannoha, “heeeeri…., somohe,elohe,gaara gaacheeno seyi; hobbahi;busha kissoonkehe yite angatenni baatto cu’mite maassidhanno. Kunino halaale ikkinota hee’ne la’noommo. Maasso adhanno mootichinna massagaano quphi yite baatto cu’matenni annuwwu maasso adhitanno.
Sa’u Arbe barra Hawaasi Quchumi giddo Sidaamu daganna teessaano assitino irkote diri lame lamalanta diinaho yaaddonna dadille kalaqinoho. “Gashshaannaho Algu elo” yitino geerri TPLF massagaano tenne baattonni higgannokkiwa hadhanno gede runtino. Nugusa maassidhino. Maassotenna rumotenni roore IFDR xaphoomu Miistirchi Sidaamu assinoirkote qeexaali Footo xallatenni galata shiqishino.
Eenni Sidaamu daga cacishaanchu Junti gobba horrate ola faninkunni , maltino,faltino,gaaddino. Woxensa,jironsanna ilansa gobba gatisate uyitino. Kuni gaadi gobba gatisate assinannia ikkasinni Sidaamu daga assitanni noo gobba gatisate gaado dhagge aqqassanno.
2013 M.D Itophiyaho qaccetenni qaccete geeshsha biillooye goodhinori, itte duubbaakkiri, mundee goodhinori, ani rewummoro hayisso ciirtoonke yitanno Juntu gaamo fantino olinni hanaaqante noo dirooti. Konni hanaaqinni Itophiya gatisate Sidaamu daga assitanni noo sharro dhagge naqqasso.
Diinu bade gana rososiiti. Juntu kaimisino babbade beehe mimmito giwanshiishate loosisi. Ikkolana Aliyeenni olu kai wote,Aliye-wodiidi,Soojjaati-Galchimi afoosi mitto foolesi shitto asse gaadi wote diinu saalino. Gobbatenna galtetenni hariimo dino yitino Sidaamu daga tenne dhagge biso ikkitino.
Xa daggino mittimma diina hembeelsitino. Ikkollana HWHT 27 diri giddo woxunninna poletikunni irkissanni dagatenna dagoomu giddo suuqqino utichi mucuqqi di yiino. Sa’u Arbe barra Sidaamu daga Irkote dira fultu wote Qoqqowu pirezidantichi kalaa Dasti Ledamohu xawisino garinni; xa biilloonyu goo’ro noonsari dagate giddo gibbonna giwansho kalaqqe fooliishsho hooltannori di hooggino. Giddo giddo noo juntu uticho gargadha mittu mittunku qeecha ikkitino daafira duuchunku qae qamattenke illacha tunge agadha hasiissanno.
Techo Sidaamu assanni noo mittimmate irkonna gaadi diinaho fooliishsho hoolinoho. Juntu seeda dirrara suuqanni keeshshino babbadamooshshu utichi techo dhuka ikkannonsata hexxo assiteeti. Ikkollana di tolinonsa. Aliye oli lamu qoqqowiha calla lawisse leellishatenni wolootu qoqqowi beeqqannokki gede soqqamaanosinni hembeelsate wo’naalino. Ikkollana irraambolla. Irraawissu dagara galatu Itophiya hursanna gatisatella.
Itophiyu diini Junta calla di ikkino. Itophiyu Olamanni noohu Ameerika labbanno jajjabba gobbuwa ledooti. Ameeriku laafa Itophiya ikkineenna hasidhu gede mulqitara hasattoseeti.
Sooriya diiggino,yemene billaallissino. Sudaane lamewa beekkino. Liibiya layinkita baqqi yitannokki gede annase shitino. Iiraaqenna Sumaale hattonni. Xa gattinosetinna Afriku giddo roorreenyanna macciishshamme Afidhinoti Itophiya callaho. Konni daafira diigate w’naaltanni no. kayinnilla di ikkannose! Mittimmanke kaajjituro; diilallo e’annota hoollummoro Cancishaancho Junta Agurrena jajjabba gobbuwara anga uyineemmokkita kalqe naqqassanno.
2014 M.D junta waamme; jajjabba gobbuwanna Itophiyu bunshe hexxitannore saalsiinse,Hidaase kofi’ne gobba latinseemmo diro ikkonke!
Bakkalcho Woxawaajje 20/2013
