Itophiyu daga diru dirunkunni bayra macciishshammenni ayirrissanno ayyaanna mereerinni mittunna quqquxamme agadhinannihu haaru diri ayyaanaati. Kalaqamu baalu xawaabba fulannonna biife leellanno aganaati Wocawaaru. Fooqu agani hanafi yannanni kayse feeffattotenna ayyaanu barrano baalunku minesi biifise, uddi’re biife, itanni hagiidhanni, akkalu dirini haaru dirira sayisinonsa Kaaliiqano galattanni ayirrisanno ayyaanaati.
Inquxaaxashi diru du’ma jawa halchonni ayirrinseemmo ayyaanna giddo mittohonna duuchanka halchishanno diru soorro ayyaanaati. Kuni haaruu diri shiqanno woytete Wocawaarote base baala baqqalu daraarchinni latanno. Mannu baalu haaroo hexxonna halchonni wo’manno. Afi’rino yanna baalantenni baxillaanchu fiixi firisi ledo dancha halchosi soorri’ranno. Korkaatuno kuni agani diru giddo umiha ikkasinni halcho/ hexxo xawisi’nanniha ikkinohuraati.
Itophiyaho agannate baalira umihu Wocawaaroho. Konne agana diru soorro, Inquxaaxashi yine woshshinanni. Kuni haaruu diri babbaxxitino su’mubbanni su’mamasi woy woshshamasira kaimu hedo ikkitinosi dhagge noosi.
Diru soorro ayyaanano Inquxaaxashi yine woshshinanni. Qaaleho babbaxxitino tiro uyinanna anfanniha ikkanna; baxxinohunni ayyaanaamittete garinni uyinannisi tiro babbaxxitinota ikkiturono diru soorro ayyaani ledo amadisiisansa baalanka mitto assannonsa. Kessate Birihaani Tesemma borqaalla tiro garinni, Inquxaaxashi yaa hawadi yannara du’mitino baatto aana ciirino/ fulino adalcho yaate. Rumushshisino su’niillisinni sanote tanni yaannoha ikkanna, diru soorro barrinni ooso konne rumushsho daraarchu aana usurte baxillaanchu, fiixu firinsara ‘’Inquxaaxashi’’ yite uyitanno wote adhihuno ‘’diru- dirunni abbohe’’ yee maassi’rannoho.
Akkalu diri goofeenna haaruu diri hanafanno woyite barru qullaawa Yohaannis, haaroo diro, Inquxaaxashi yaamamanni woshshamanno.
Diru soorro Wocawaaro ikkasi korkaati arrishsho, aganu, beeddakko dirunnita doyichonsa Fooqu aganinni gudde Wocawaaru aganinni marro hanaffanno daafiraati. Hashshuno barru ledo gaamamanno. Hashshuno barru ledo amadaminoha ikkanna; dirono hegersine kirriha ikkiro sase xibbeenna layna onte /365/6/ barra ikkanno.
Qulaawu maxaafi xawisannonte gede, Nohi diri qalqe wayinni wonshe keeshshi gedensoonni layinkimeeshsho hakku wayi xeino yanna ikkitinohuraati. ‘’Umi agani eorano baatto leeltu’’ yaate Inquxaaxashi yinoonnihu umihunni ‘’Muxxe- rumushsho abbitta’’ yee daraarchu dhoohinota kulanno. Layinkihunni, Nohi sasente oososira hixunni danna bebbeehanna Afriku Kaamira iillisi. Afriku baatto ei yannarano umo asse fooliishshi’rinohu Itophiyahooti. Gobbano Adey yinanni daraarchinni biiffe noonkanni. Aganuno Wocawaaro ikkasinni tashshi yeennasi muxxe kaayyo fultue yee tenne yanna Inquxaaxashi yiinose.
Sayikkihu, Itophiyunniti Mootitte Saaba/Azeebi fullahaanchu Selemoonire macciishshantenni la’’a doodhitinohura duucha dukkisaanose ledo mootichisera anga hiixantannire amadde mootichu Selemooniwa hadhu. Mootichuno hagiirrunni haa’rese ‘’muxxerichi qubbichikki seesira ikkohe’’ yaatenni shoole kuula afidhinota ikkite hashshano ikko barra shoolu daninni xawissannota cuuiicho uyinose. Aganuno Wacawaaru aganiraati. Konni kaiminnino Inquxaaxashi yaanno su’mi fulino.
Wolu haaruu diri su’mi, Qullaawa Yohaannisi ledo amadaminohunni su’maminoha ikkasiiti. Cuuaanchu Yohaannis loosi Wongeelu/ Gondooru dirira kaima ikkanno gede yaatenni Wocawaaroho umikki barri diru ayyaana ikkanno gede annuwu yoo sayissino. Konni aganihu barrunna hashshu taalo 12 saateeti. Konni gedensoonni barru xeanni ha’ranno. Haaru diri tiro diro woy barra labburono; manchi beetti haaru diri gede giddosino haaroo’mito!
Jeefoteno, diru soorro barri konni aleenni la’nummori, babbaxxitino su’muwanni woshshamiha ikkirono; diro haarooho yine woshshinirono haaroo ikka noonsari agananna wogga calla ikkitukkinni ninke amanyootina akatino hattonni. Akkalu 2016 MD saeenna/ goofeenna kuni 2017 MD (Haaruu Diri) daanno woyite cubbbunni, bunshetenni, taantotenni ishine keeshshino bisinke maarotenni, danchu akatinninna loosinni, danchummatenni, haaroo’ma noosi.
DANCHA HAARO DIRO!
Bakkalcho Wocawaaro 2, 2017 M.D
