Keeru hee’rirooti looso’ne lophinannihu. Miinji’nannihu, ille lossi’nannihu, hobbaatunni fulle e’nanni loosi’nannihu; hiittenne qooxeessubbarano millinse hee’ra dandiinannihu keerunna hobbaatu agaramino qooxeessiraati. Konniraati, gobbate keeri hee’riro dagoomuno hasi’ranno garinni loosi’re miinji’ra dandaanno daafira heeshshono woyyaabbinota ikkitannohu.
Ga’labbote loosi akatisinni qinaambe loosa xa’manno. Ga’labbo marqu qaaqqi gede awuutama hasidhanno. Qinaambe yinanni woyte ga’labbote bissa dagoomaho shiqqinota ikka hasiissannno. Dagoomunna ga’labbote bissa mimmitunniwa shiqqe hasaabbanni qooxeessaho noo woy heedhara dandiitanno mitiimmubba daafira hasaabbanni qarrubba tira dandiituro qooxeessu keeri geinoha ikkanno.
Wolu garinni, handaarunni deerru deerrunkunni noo uurrinshuwa dagoomu keeri garunni agarama dandaanno gede qeechansa fultara agarranni. Handaaru uurrinshubba tantana calla qarra tirtannota dikkitanno. Tantannoonni uurrinshubba garunni owaante uytannore ikkitara hasiisanno. Xaa yannara gobbankera babbaxxitino qooxeessubbara ga’labbo booreessitanno wolquwa ka’anni hunote assootubba giddora e’anna la’nanni. Dagate qoosso daafira sharrammeemmo yitanno bissa uminsanni harinsho ba’e ilte lossitinonsa daga insanni gawajjitanna la’nanni hee’noonni. Togoo ikkito “Qansino unuuna ga’mate” yine xawinsanni.
Ayi ayeera sharramanni nooro; marichira ka’e sharrantannoro nafa badde affinokki wolquwa duucha yannara qarra gantanna babbadamooshshe kalaqqanno hedubbano hattonni kalaqantanni noo ikkitubba gatisate xaa yannara gobboomu deerrinni babbadamooshshe kalaqqanni daggino hedubba lainohunni gutunni hasaambe tidhate amaalamme harisateno balaxote loossa loonsanni hee’noonni. Eeli geeshsha dirrite Amaalammete komishiine gobba hursitanno yine hendanni bixxillubbanna sirnya gamba assitanni afantanno.
Tenne yannara gobboomu amaalamme harisate hananfoonni loossanni base basente dagate mereero gutunni hasaambe sumuu yaa dandiisiissanno hedubba balanxe gamba assinanni hee’noonni. Albillichono danchu garinni gumulamenna gobboomu mittimmanke roorenkanni kaajjiteenna la’’ate hexxo assi’nanni.
Hedote badooshshe gutunni hasaabbe gutunni sumuu yaa dandiitanno garinni loosate budi lopha noosi.
Ga’labbote uurrinshuwano dagoomunniwa adhamooshshe afidhanno gede hattono dagoomu keeru hajo ninkete yaatenni gutunni loossanno gede hala’lado huwanyoote kalanqoonni daafira hasi’ni yannanni keeraatunni fulle e’nanni qooxeessa kalaqa dandiinoonni Sidaamu qoqqowira. Togoo rosichi baalante gobbate qooxeessira rosama noosi. Dagoomu ga’labbote uurrinsha ninkete yaatenni uminsanni woxe fushshite ijaartanni noota la’’a dandiinoonni. Hegeraamu keerira dagatewiinni agaranni murci’raanchimma kaajjado ikkase uurrinshanke kadde naqqassanno.
Dagoomu beeqqo seekkite buuxxino mootimma hiikko qooxeessirano daga keeru daafira seekkite huwatte halantanno garinni loossanno. Konni daafira xa noo ga’labbo poletikunni, amma’note korkaatinni, biilloonye hasi’rate kaiminni ga’labbo booreessate hasi’rannoha hiikkonne hallanyano ikko poletiku manna adhitukkinni keerinsanna gutunni latate daafira sharrantanno daga heedhanno gede jawaachisha hasiissanno.
Sidaami daga kayissanni keeshshitino xa’mo garunni dawaro afidhu gedensaanni latishshu widira kamballi yitino. Daganke lata hasidhanno. Latate kayinni qarunni keeru hee’rara hasiisanno. Gutu keeri daafirano gutunni loosa agarranni.
Dagate latishshirano qoqqowu mootimma murcidhe duuchu handaarinni loossanni afantanno. Xaa yannara qoqqowoho duuchu handaarinni dagganni noo soorronna danchu gumira kaimu keeru hee’rasiiti. Keere agarsiissanno uurrinshubbano hakko bikkinni dhuka lossidhanni dagginota la’noonni. Qoqqowoho hegeraamu keeri hee’ranno gede ga’labbote uurrinsha hashsha barra murci’raanchimmatenni loossannota kulloonni.
Qooxeessaho keeru hee’riro dannunni xaandanni qoqqowubba daga mereero danchu xaadooshshi hee’ranno. Kunino, dagate mereero mittimma, Itophiyimmanke kaajjishi’rate, gutunni loosi’ne latishsha halashshi’rate jawa qeecha afi’rino. Hiittenne hedo lainohunnino sumuu yaa hattono qeelaancho ikka dandiinannihu mittichu doorshi gutunni hasaambe mimmito macciishshatenni sumuu yaa dandiinirooti.
Konniraati, xaa yannara gobboomu deerrinnino kalaqantinota hedotenni sumuu yaa hoogate qarrubba daga mimmitu ledo hasaabbe tidhatenni albi mittimmanna sumimme higganno gede assinanni hee’noonnihu.
Konnira, hiikkonne latishshano halashshatenna agarranni lopho buuxisiisate hattono dagoomu mereero hee’ranno xaadooshshi kaajjanno gede keere garunni agarsiisate loosi kaajje sufa noosi.
Bakkalcho Woxawaajje 30, 2016 M.D
