Itophiyu atileetiikisete champiyoonubbanna olompiike labbino jajjabba heewote barubbara seedu xeertinyi dodanshonni haammata qeelle borreessiisatenni kalqete gobbuwanni umi bayicho amaddanno. Heewotenni gamba assidhino medaaliyubbanni roore anga 10 na 5 kume meetire xeertunyubbanni afidhinoho. Kuni Itophiyu budu ispoorte gede assine kiirranninna haammata dhagge loossanno atileetoota kalaqino xeertinyi; sa`u sase olompiikubbanni woffi yiino gumi borreessamino.
Paariisi olompiikera tenne xeertinyubbanni borreessamino medaaliyi kiiro qole dhaggetenni hooffayidita ikkitanna; kunino seeda yanna gedensaanniti. Labballu 10 kume meetirenni callicho birru medaaliya borreessiinsirono; seennunni kayinni 32 diri gedensaanni medaaliya afira didandiinoonni. 5 kume meetirennino lawino garinni lamunkunni tee/ koo guma borreessiisa dandiinikkinni sa`noonni. Kalqete champiyoonennino ikkiro xeertinyunni ronsoonninte gede kaajjado atileetoota kalaqa didandiinoonni. Guma hooganna albinte gede qeelle sufisiisa hoogate korkaati huluullisannoho.
Xeertinyubbatenni jawu su`mi noonsa mannooti mereerinni albi atileetichinna biheeraawe gaamo qajeelshaanchimmatenni 25 dirra ale owaatinohu shaambel Tolosa Qotu, seedu xeertinyinni gumu aja xa dayno qarra ikkikkinni seeda yanna kiirsiisinoha ikkasi xawisanno. Paariisi olompiikenni baxxinohunni 5 kume na 10 kume meetirenni lamunkunni tee/koo borreessiinsanni yine agarroonnihu culku medaaliyi diborreessamino.
Tookiyo olompiikennino 10 kume meetire atileetichu Selemoon Baareggahunni culku medaaliya calla borreessiinsanna mayra yee xa`mo kaysa hasiissannonkanni yaanno bareedu atileetichinna qajeelshaanchu. Gongo`manni keeshshinohu seedu xeertinyi gumu hoongi hedeweelcho borreessinanni guminni diwame daasinni paariisi aana mitto culku medaaliya borreessinikkinni gantoonnitano huwachishanno.
Itophiyu atileetiikise qajeelshaano maamari murrichinna atileetiikisete federeeshiine tekiniikete komite miila ikkinohu qajeelshaanchu Tolosi; balanxe Tookiyote guma keena hasiissannonkanni yee coyi`ranno. Shaambel Tolosa seeda dirrara qajeelshaanchimmatenni owaatino yannara ledosi loossanno qajeelshaano ledo ikkatenni atileetoota qajeelshunni keenenna ikkadimmansa la“e doorannota qaaganno. Xa kayinni jawa olompiikete bare harinsihu gedensaanni olompiikete komitenna atileetiikisete federeeshiinenni keeno assa hoogatenni gumu dirranni dayno.
Heewubba keennanni woyte leeltanno qarrubba tirateno harunso assa hasiissanno yaanno. kuni ikka hoogasinni culku medaaliy borreessamikkinni gatino. Seennunni kaa`laancho komishiinercho deraartu Tullu, Xirunesh Dibaabanna Meseret Deffaar baca qeelle borreessiissinota ikkiturono medaaliyu gobbaanni ikka albi soronni rosicho adha hoogateno yaanno.
Shaambel Tolosi xawishshi garinni; Paariisi aana labballu 10 kume meetirenni atileetootu doddanno garinna hayyote soro ikkitinotanna qajeelshaanotewinni uynoonni amaale ikkitara dandiitannokkitano coyi`ranno. Seennunni atileeticho Gudaaf Tseggayete gobbaanni noori qajeelshu xe`ne noonsare ikkitanna, Gudaafino sase heewonni beeqqase korkaatinni ikkadimmase dirritino. Sese xeertinyubba dodate mudhite e`ankunni mittunni kaajjite shiqqeemmero, 10 kume meetirenni gumaame ikkitannonkanni.
Gaamote looso gumulateno atileetootu dhuki taalinokkiha ikkasinninna addi addinni loosansanni gumu dirrara dandiino. Kunne coye la`ne albillicho loosu hayyo soorrinannikkiha ikkiro qarru tidhamannokkitano coyi`ranno. Ledotennino konni albaanni gumma dagginota biheeraawe gaamo xiinxallinikkinni diiga gumaamimmatenni suffannokki gede assasinni biheeraawe gaamo wirro tantanama noose yaanno. Atileetiikise Itophiyu mittimmate xawishsha ikkasenni loosu amanyooti qorqorama hasiissannotano qummeessanno.
Lame olompiikubba 10 kume meetire birru medaaliyi qeelaanchi bareedu atileetichi Sileshi Sihin isi widoonni; xeertinyunni gumu ba“anno gede assino korkaati atileetootu gutunni qixxaawo assa hooga, mittimmate, egennamatenna irkisamate ayyaani kalaqamannokki gede assinota coyi`ranno. Ledotennino federeeshiinete loosu gumulsiisaano sumuu yite doorshu wodhonna qajeelshu amanyoote diriirsa hoogansa korkaataati yaanno. Ikkinohurano sumuu yitenna keffeenya kayisanno garinni baalunkura xawado wodho worte atileetoota noonsa guminni doorte hallanyunninna gutunni gumaamma ikkitanno gede assa hasiissanno yaanno.
Paariisi olompiikenni atileetootu dandiitannore assitinota qaagiissiise Shilesi; qajeelshu doogo seekkine qorqora hasiissannotanna atileetootu aana xiiwo gashshannokki garinni gumaamma ikkitanno xeertinyinni calla heewisantanno gede assa hasiissannota coyi`ranno. Haammata harinsho sodhino massagaano wodanchinoonnita xawisannohu bareedu atileetichi; loosu gumulsiisanchinni ikkikkinni qajeelshaanotenni massagantanno federeeshiine lawannotano coyi`ranno. Heewo beeqqonnite yinannihu gara ikkinokkitanna togoo manninni massagantanno olompiikete komitenni guma agara jiffannota ikkase huwachishanno. Bare atileetootahonna gobbate noose ayirrinyi jawanna baca medaaliyubba borreessantinoha ikkasenni haariima hasiissannokkita hedosi coyi`ranno
“Tookiyo olompiikenni kalaqantino qarrubba dongo`Mitanni daansanni olompiikete komite qorqorama noonsa” yaannohu Sileshi; sasu dirira albaanni kalaqamino qarri Paariisi harannokki gede komite budunna ispoortete ministere hattono atileetiikisete federeeshiine ledo maa assa hasiissanno yitanno hajo aana millimillo assitinotano qaaganno. Komite federeeshiinubbate ledo sumuu yite loossannokkihura loosu amanyoote qorqorrenna keenne mootimmatenni raga wora hasiissannota qummeessino
Abbebech Maatewoos
Bakkalcho Woxawaajje 16, 2016 M.D
