Yannatenni yanna heewisamaanchimma sa’anni dagginoti ispoortete kalqera, dagate ragaanni naadammenna ayirrinye lexxitinori co’icha hunkeensa dunte gumaho duucha woyte witiittannori baaliiqu akatinsanni subbino ispootenyooti haammatootaho. Tennenni gurchotenni babbaxxitino korkaattanni ayirrinye, gumaamimmanna qeelaanchimma maareekkirate kaajje loosantenni roore harancho doogo harunsitanno ispoortenyoota la’’ano daafursannoha ikkanni nooha dikkino.
Ispoortete nafara jiffannoseti akatoomu gobbaanni ikkitinoti harancho doogo iillinannise woyteno gumisenni ispoortenyootu umo duwisiisatenni calla dikaajjishamantano. Riqibbino gobba qoleno kilawe shotisatenna godo’lennita assi’rate geeshsha sa’’annote.
Xaa yannara ispoortenniha heewote co’icha ayyaana hadhoonsitannonna booreessitanno, harancho doogganni mittu diru awaawurre woy mitootu xawissanno garinni diru gawalshi albisaanote giddo ofollannoho.
Atileetiksete handaarinni baxxinohunni seeda xeerto bati’rino su’ma lexxitinoti Itophiyu ayee gedeno atileetootise dandaami bikkinni dandoonsanni ammantannore uminsannino sa’e gobbansanna ayirrinyensa heddannoha ikkirono mitiimmate reqeccishamaano ikkitino gobbuwa giddonni mitte ikkase anfoonnite.
Atileetootunniti diru awaawurre hajo huluullissannota ikkitanni daase marro marrotenni xawisantanni keeshshitino. Ispoortete maatenni kayse ogeeyyete geeshsha, qajeelsiissanotenni kayse uminsa heewisamaano atileetootu geeshsha hattono heewote ha’nura Itophiyu Atileetiksete Federeeshiine geeshsha diru garimma hajo diwa dandiinannikki garinni batidhe leellitanna la’noommo.
Tenne mitiimma gargaratenna qorqorate ragaanni ripoorte deerrinni muli yannuwa kawa addi illacha uyne loonsanni hee’noonniha ikkasi xawinsanna keeshshino. Ikkeennano baattote aana la’nannihu konninnino baxxitino misile biliccishannoho. Seerimale harinsho hedotennino gumulotennino uurra dandiitinokkita hegersate barrubbate albaanni faajje ikkinohu buuxishshu gumi ikkado farco assine adha dandiinanniho.
Itophiyu Atileetiksete Federeeshiine barrubbate albaanni Itophiya riqibbe Julay 16-20/2025 Nayjeeriyaho Abukuta 18 diri woririnna 20 diri wori atileetiksi shampiyooni aana beeqqitanno atileetoota aana diru gumi buuxo gumultino.
Federeeshiine Itophiyu Poolisete Hospitaale Foreensiki Meedisiininna hadhaambete buuxishshi goli 76 atileetootira diru buuxo assino. Assinoonni buuxishshi ilamishshu yanna, MRI, rosu deerra, xaphooma bisu lophonna uurrinshu gara, hinkote ciiranna lophote deerra raajetenni immeejingenni bisu miqqa lopho deerri diru buuxishsha assinoonniha ikkanna, hospitaalete foreensiki xagichunna toksi kolleeje ispeeshaalistootinni assinoonni.
Gumunnino 18 diri worinni borreessantino labballu atileetooti mereerinni mittuno 18 diri worihu nookkiha ikkanna, 4 atileetooti 20 diri worire ikkansa diru buuxishshinni buunxoonni.
18 diri worira borreessantino seennu atileetooti giddonni 2 atileetooti callu 18 diri worire ikkitanna 9 atileetooti 20 diri worire ikkansa buunxoonni. 20 diri worira borreessantino labballu atileetooti giddonni 2 atileetooti callu 20 diri worire ikkansa buunxoonni. 20 diri worira borreessantino seennu atileetooti mereerinni 5 atileetooti 20 diri worire ikkansa buunxoonni.
Konni kaiminnino diru buuxishsha assitino 76 atileetooti mereerinni sa’ino atileetooti giddonni 6 labballonna 16 seennu xaphoomunni 22 atileetoota ikkansa anfoonni.
Diru awaawurre gargaratenna qorqorate adha hasiissanno qaafubba handaaru egennaammi qummeessitanno garinni, diru awaawurre daafira busha qeechuwanna seerubbatenna wodhote daafira huwanyo cu’mishiishate aleenni ‘’diru awaawurre xawunni hooltannonna sa’ne gumulantanno woyteno adhinannire ayirritanno qaafubba egensiisa qoleno gumula tinino atileetoota, qajeelsaano, kilawubbanna ayee beeqaancho bisono amadara hasiisannotera illacha uytanno.
Demmellaash Demmeqe
Bakkalcho Ella 26, 2017 M.D
