Baalante gobbate qarqartora 8kinna 6ki kifile fonqolu guma faajje assinoonniti qaangannite. Dayino gumi mitoho hagiirre, mitoho kayinni dadille haa’re dayino. Lamunkunni ikkinokkihuno dihooganno. Tenne mayira kayinsummo?
Ayirradda nabbawaanonke tenne lamala seyoote gafinke hagiidhaabbinore kisanno. 8ki kifile qoqqowu fonqolo adhite luphiima guma borreessiisatenni aantino kifile sa’ino rosaano rosichonsa beekkara hedatenni hasaawinse niwaawete shiqinshoommo. Coyinke aana techo ninke borrote shiqinshoommo rosaano lawishsha assate hende ikkinnina kuri gobbaanni haammata bilchaatanna qaddo ikkanno rosichi noonsa rosaano noota qummi assine sa’’ate banxeemmo.
Rosaancho Hermella Demissiti Hawaasi quchumi Qullaawu Gebreeli umi dirimi rosi mini rosaancho ikkitanna tayxe 8ki kifile qoqqowu fonqolo adhitino rosaano mereerinni mittete. Rosaancho Hermella Demissiti fonqolo (100%) ikkino guma abbatenni qoqqowoho xaphooma jawiidi guma borreessiisse 9ki kifile widira sa’ino. Konninni, batinye bilchaatanna worba rosaanonni mittenna albisa ikkitara dandiitino.
Rosaancho Hermella hanafotenni kayisse deerru rosaancho ikkase umise foniinni maciishshinoommo. Yanna horonsidhanno gara xawissanni; “Ani lamalanka barra mixo fushshi’reeti horonsi’reemmahu. Sanyotenni Arbete geeshsha rosu mininni barra 9:00 saatenni higummahu gedensaanni boode yanna fooliishsho assi’re fushshiroomma mixo garinni xiinxallo’yara higeemma. Roorenkanni hashsha yanna xiiwe goxeemma. Baxxinohunni tayxe fonqolamaancho ikka’yanni hashsha ka’’eno xiinxalleemma. Qidaamenna Sambata kayinni fooliishshote barra ikkinohura maate’ya ledo sayiseemma yanna heedhurono mereeroho kayinni nabbawa’ya diagureemma. Konni garinni roore yanna’ya sayiseemmahu xiinxallotenniiti” yitanno.
Diru goofimarchira rosaano borreessiissanno gumira maatete amadooshshi jawiidi qeecha amadanno. Rosaano rosu mine kifilete giddo rosiisaanchu rosiisanna harunsitinnohunni ledote maatete irko jawa qeecha amaddannoti addaho. Barra rossinoha mini giddo xiinxallitanno gede assa, xawinonsakkiri lexxe xawannonsa gede kaa’lanna irkisa maatetewinni agarantannote.
Togoonni keeshshino rosaanchi diru jeefora gumisi hagiirsiisannoha ikkanno. Rosaancho Hermella rosichino konninni xeerti’rinoha dikkino. Maatese lowo geeshsha irkissannoseta hasaabbinonke. “Anjenni hanafe bilchaata rosaancho ikkeemma gede dandiisiissinoeri maate’yaati; xawinoekkiri hee’riro mini giddo xiinxallisiisatenni worba rosaancho ikkeemma gede insa kaa’lo jawate” yaatenni maatese kaa’looshshe kultanno.
Hattonni rosiisaanose ledono danchu xaadooshshi nooseta kultannoti rosaancho Hermella; rosiisaano’ya xawinoekkire xa’meemmansa gede jawaachishatenna huwachishatenni kaa’litannoe yitanno. Tenne widoonni rosu minino rosaanote noosi amadooshshi danchaho. Baxxinohunni fonqolamaano rosaanora assanno irko danchate. Kunino fonqolamaano rosaanora sa’ino fonqolu woraqatta shiqishatenni, baxxitinota xiinxallinanni borro injeesse shiqishatenna rosaano dancha guma abbitanno gede lowo geeshsha kaa’lanno rosu mineeti. Konninni, tayxe 6kinna 8ki kifile qoqqowu fonqolo wo’manti rosaano sa’ino yaatenni hedose wortanno.
Rosaancho Hermella albillitte ajuujase kultanni; “Ani konnere ikkeemma yee dimudhoomma, kayinnilla hiittenne ogimmannino bobbahe dagooma kaa’lanno looso loosa hasi’reemma” yitino.
Woloottu rosaanora sokka sayissanni; “Umihunni, rosaano duuchankare dandiitannota ammana noonsa. Layinkihunni, dancha guma borreessiisate seekkite nabbawa hasiissannonsa. Iillate hasidhanno timo wodhite yannansa garunni horonsidhe nabbabburo heddinowa iilla lowo geeshsha shotate. Fonqolu maxaaffate gobbaanni daannokki daafira maxaafansa seekkite nabbawatenni dancha guma abbitara dandiitanno” yitanno.
Wole rosaancho Mahileet Yoonaas yaamantanno. Iseno Hawaasa Qullaawu Gabreeli umi dirimi rosi mini rosaanchooti. Tayxe 8ki kifile qoqqowu fonqolo adhite 99.99% ikkinoha luphiima guma borreessiisatenni 9ki kifile sa’ino. Rosaancho Mahileetino jaalase Hermella gede rosichose beekkinonkeha ikkanna hundinni hanaffe bilchaatanna deerru rosaancho ikkase hasaabbinonke.
Yanna garunni horonsirate daafira kultanni; “Duucha woyte rosaano de’’antannohu horonsidhannota xiinxallote hayyo afa hoogansanniiti. Ani baalunku rosu daninni babbade mixo fushshi’re nabbaweemma. Hattono aanino barra kifilete giddo rosammara dandeemma roso balaxe mini giddo nabbawe umo’ya qixxeesse ha’reemma; rosiisaano kifilete giddo rosiissanno woyteno illacha tuge harunseemma; xawinoekkire hakka woyintenni xa’me buuxeemma. Jaalla’ya ledono xa’mubba loonsanni xiinxallineemmo; mini giddo maate’yano uminsa kaa’lo assitanno’’e. Irkishshu maxaaffano horonsi’reemma. Ledoteno, Yuutuubeteno rosi’yara kaa’litanno viidiyo la’’anni konni garinni umi’yara mixo fushshire yanna’ya horonsi’reemma; fonqolohono qixxaaweemma” yaatenni xawissanno.
Rosaancho Mahileeti albillitte ajuujase kultanni; “Albillitte xagisaancho ikka hasi’reemma. Korkaatuno, gobbanke lophitanni noota ikkiturono xagisaanote anje no; daga xaginaate afi’rate ikkado xagisaano heedhara hasiisanno. Baxxinohunni, baadiyyete qooxeessira heedhanno daga xaginaatu owaante mulenni afi’ra noonsa. Konniraati xagisaancho ikkate hasi’roommahu” yitanno.
Jeefoteno, sokkasenni; “Ninkera badheenni dagganno rosaano umonsa jawaachisha hasiissannonsa. Rosiisaanonsa ledono xawado ikkite huwattinokkire xa’matenni umonsa kaa’la noonsa. Fonqoloho ikkadda ikkite shiqate assa hasiissannonsa sharro baalantanni assitanno gede” yitanni sokkase sayissanno.
Wolu techoonkehu seyoote gafi borronkenni shiqinshoommohu rosaanchu Liyyuneh Anaatoho. Hawaasi quchumira afamanno Mekaaneyyesuusi umi dirimi rosi mini rosaanchooti. Isino tayxeha 8ki kifile qoqqowu fonqolo 99.85 ikkino guma borreessiisatenni aantino kifile sa’’ino bilchaata rosaanchooti. Rosaanchu Liyyunehi; isino rosaano Hermellanna Mahileetinte gede hundinni hanafe deerru rosaancho ikkasi kulinoke. Rosaanchu Liyyunehi yanna horonsi’ranno gara kulanni; “Sanyotenni Arbete geeshsha rosu mininni higummohu gedensaanni noo yanna nabbawatenni sayiseemmo; Qidaamenna Sambata kayinni godo’letenna wolu loosinni sayiseemmo” yaanno. Konni gobbaanni xawinosikkiri hee’riro mini giddo roduuwisi kaa’litannosita coyi’rino.
Rosaanchu Liyyunehi bilchaata rosaancho calla dikkino; misilete dandoono noosi; tenne dandoosinni Lekkate kuwaase godo’laancho Roonaaldo lendanna haammata misile loosinota kulinonke. Ledoteno Lekkate kuwaase batise baxanno; Adaane Girmihu qacale Lekkate kuwaase gaamono karsamino. Fonqoloho qixxaawa noosita wodanchi woyte kayinni godo’leno misileno facci asse agure wo’ma illachasi rosoho tugino.
Eewa garanko! balaxo rosoho aa busullete. Baalunku coyira kaimu rosoho. Ikkirono, yannasinni ledote aamantino dandoo huna dihasiissanno; ledotenni aamaminonke aamansha rosinkera qoteho harisa dandiinanni. Togo assate kayinni hayyo hasiissanno. Rosaanchu Liyyunehi techo qaaqqoho; dirunnino hedotennino anje heedhanno. Konnira, wolere agure illachasi rosoho tugasinni luphiima guma borreessiisara dandiino; tini busullete.
Maateno oosonsa seekkite harunsa hasiissannonsa. Rosinsanni ledote baxxitino dandoo heedhunsaro hattenne dandoonsa huntannokki gede lamenkare qote qoteho harisa dandiitanno hayyo kalaqatenna jawaachishatenni irko assa maatetewinni agarantannota qaagiissate banxeemmo.
Ayirradda nabbawaanonke mannu baalu wodanchara hasiisannohu mittu coyi no; isino kalaqamisinni laafu woyi dhukiweelu rosaanchi dino. Kalaqammihu gedensaanni aamamino dhuka fushshine horonsirate deerri mittu mittunku manchiwa babbaxxanno; kowiichooti badooshshu kalaqamannohu. Konni daafira shiimunnino ikkiro tenne borronni rosicho adhitine ooso’ne hundinni hanaffine jawaachisha, irkisanna dhukansa garunni horonsidhannore assine lossa maatetewinni agarantannota qaagiissate banxeemmo.
Rosaano, ki’neno albaaggine jawaatte; techo worbimma’ne agadhitine suffe; ga’ara gobbatenna ilamate ikke; aaninohu rosu diri dancha ikko’ne. keerunni.
Qiddist Gezzaheny
Bakkalcho Woxawaajje 16, 2016 M.D
