Itophiyu Olompiikete barenni lamunku koo/ teenni 800 meetire jeefishshinni Meedaaliyu giddora e`inno dhagge dinose. Itophiyu Atileetooti xeertinyu Olompiike dhaggenni Meedaaliya agurranna jeefishshunni sharrantanna qaanganni hedeweelcho dibacate.
Tayixe kayinni wedellitte Atileeticho Tsigge Duguma tenne dhagge Paarisi Olompiikera soorra dandiitino. Tenne lamala giddo Sanyote hashsha 4:45 harinsoonni seennu 800 meetire jeefishshinni Tsigge Dugumiti 1:57.15 ikkitino wiinamu saatenni layinkita ikkite jeefisatenni xeertinyu dhaggenni lamunku koo/teenni umi Meedaaliya adhitino Atileeticho ikkitino. Culku gatinosehuno gaabbisanno garinni busullete so’ronniitinka. Umi Olompiikete beeqqosenni kayinni gumise jawahonna maala`linanniho.
23 diriti wedellitte Atileet Tsigge Dugumiti Xurunesh Dibaaba Atileetiikisete qajeelshi guma hattono Daddalu baanke kilawe Atileetichooti. Gobbase A.K 2017 Aljeeriyu qixxeessaanchimmanni harinsoonni 20 diri woro Afriku Atileetiikise chaampiyoone riqiwatenni 200 meetirenni Birru Meedaaliya luka dandiitino.
400 meetirenni qole 2019–2022 geeshsha Itophiyu chaampiyoonenni Medaaliyu ayidde ikkatenni keeshshitino. 800 meetirenni umi heewose Beljiyemete assite qeelletenni jeefissinoha ikkanna Belgireed kalqete mini giddoydita Turkete heewonni 1:59:66 ikkitino wiinamu saatenni umita ikkitinonkanni. Roorte leeltinno Gilaasiko mini giddo kalqete chaampiyoonennino heewo jawaatte dodatenninna goofimarchu doycho witiitte dodatenni badooshshe kalaqqe 2:01.90 ikkitino saatenni diwatenni Itophiyu Atileetiikise dhaggenni xeertinyunni umiha Culku Medaaliya borreessiissino.
Gaanaho harinsoonni Afriku godo`lubbannino Culku Medaaliya lukkino. Loos Anjelesete qole 2kita ikkite jeefissinoha ikkanna 1:57.56 ikkitino umiseta wiinama saate borreessiissino. Olompiiketenni kaajjado bocu bocinna bocu jeefishshu heewubba aana leellishshinohu maala`lisanno dhukino Meedaaliya agadhitanno gede assinose.
Agaramaancho ikkitino seennu 5 kumi meetire heewonni Itophiyu lee Olompiikubba gedensaanni umi yannara Medaaliyu gobbaanni ikkitino. Keeniyunniri Betriis Chibeetinna Feyizi Kipiyegon aante aantetenni e`urono Kipiyegon heewote mereero Gudaafi ledo assitino xixxiiwamanni gumu gatino. Konninnino sayikkita ikkite jeefissinoti Nezerlaandaawitte Siifen Birre adhitino. Jawa darga uyinoonninsari Itophiyunniri Ijjigaayyehu Taayyeti 6ki, Mediina Iisa 7ki, Gudaaf Tseggaye 9kita ikkite jeefissino. Kunino 24 diri gedensaanni Itophiyaho xeentinyunni hoffaydi guma ikke borreessamino.
Itophiyu konni albaanni borreessantino gummanni xaphooma 3 Culka, 1 Birranna 5 Camote Meedaaliyubbanni kalqetenni umita gumaame gobba ikkitino. Keeniyu 2 Culka, 1 Birranna 5 Camonni jeefissino.
Abbebech Maatewoos
Bakkalcho Woxawaajje 2, 2016 M.D
