Olompike sayikki yannara qixxeessate kaayyo afidhino Paarisete heewo harisa hananfinkunni mitte lamala kiirantanni afantanno. Xaa geeshsha gobbuwa babbaxxitino Ispoortuwanni Meedaaliyubba borreessiissanni deerru sha’’e aana heewisantanni afantanno.
Gibtsenna Wodiidi Sudaane labbino gobbuwa Meedaaliyubba borreessiisatenni Afrikunni balaxaano ikkitara dandiitino. Tenne Atileetiksete heewonni kayinni Itophiya lendanna woloottu Ahigurenniri jawaata heewisamaano Meedaaliya borreessiissanno yine agarranni.
Itophiyu tayxe 15ki Olompikete beeqqo assitannoha ikkanna Paarisete Olompike heewoseno labballu 20km haruminni hanaffannoha ikkanno. Waa daahatenna Atileetiksete Ispoortuwanni beeqqannohu Itophiyu 43 ikkitanno Atileetootinni riqiwamanno.
Kuni xeertinyi 800M meentunni, 20KM labballu harumunni hattono meentunna labballunni 1500M, 3000M, 5000M, 10 kume meetire hattono Maaratoonetenni ikkanno.
Sa’u beeqqosenni 23 Culku, 12 Birrunna 23 Camote xaphoomunni 58 Meedaaliyubba borreessiisa dandiinohu Itophiyu; tenne Olompikenni afantanno mreerimunna seedu xeertinyi heewonni ledote Birra borreessiissanno yine agarranni.
Shoole dirra albaanni Tookiyote harinsoonni Olompikenni Itophiyu labballunni 10 kume meetirenni Atileet Selemoon Baaraggihunni afi’noonni mittichu Culku meedaaliyinni hattono 1 Birrunna 2 Camote xaphoomunni 4 Meedaaliyubba angara qoltinoti qaangannite. Paarisete Olompike harunsite kayinni Itophiyu Olompikete komite balaxxe uyitino xawishshinni; gaamo borreessiissara heddino Meedaaliyi kiiro xawisse kultinokkiti qaangannite.
Ikkirono, gaamo heewisantino addi addi xeertinyinni Meedaaliyubba borreessiissanno yine hexxo assinoonni. Itophiyu Olompiketenna kalqete shaampiyoona hattono kalqete balaxote yanna amaddino Atileetoota amadase tenne hexxora korkaataho.
Atileet Shaambel Abbebe Biqilihu Roomu Olompikera balaxote Culku Meedaaliya kaysasinni xaa geeshsha Itophiyu su’mi ka’’annohu jawaata Atileetootisenniiti. Gobbatenni sa’e Ahiguretenna kalqete deerrinni haaro dhagge borreessiissino bareeddansa gede xaano kalqete Atileetikse maate wedellu Atileetooti ikkadimma la’’ate quqquxantanno.
Tookiyote jawaata Ugaandu Atileetooti Joshuwa Chiptegininna Jakop Kiplimooni harunse Culku Meedaaliya adhinohu Atileet Selemoon Baaregga Paarisete lowohunni agarranni Atleetichaati.
10 kume meetire xeertinye massagannohu wedellichu Atleetichi sa’u kalqete shaampiyooni aana agarroonnisi garinni afama hoogirono tayxe amadino uurrinsha garinni meedaaliyaho heewisamannoha ikkanno. Gaamote miillasi Yomiif Qejeelchanna Berihu Aregaawi hettisamaanonsara higgannokki Atileetoota ikkitinoti anfoonnite.
Meentunni konni xeertinyinni sai diro Budaapesti kalqete shaampiyoona ikkitinoti Atileet Gudaaf Tseggay, gaamo amaddinorinna heewisamaanonsara yaaddo ikkitino Itophiyu Atileetooti mereerinni mittete. Atileetitte 5 kume meetirenni Tookiyo Olompike aana Camo afidhinoti qaangannita ikkitanna sai diro kayinni kalqete yanna woyyeessatenni xeertinyu qaddo Atileetitte ikkase leellishshino.
Wolu kalqete woyyaabbino yanna amadinohunna xeertinyunni hexxo tunganni Atileetooti mereerinni gaamamannohu 3 kume meetire roqqu heewisamaanchi Atleetichi Lemmeecha Girmiho. Itophiyu shiima Meedaaliyubbanni sa’’ino guma borreessiissino konni guminni afi’noonnihu kuni Atileetichi; Tookiyote Birru Meedaaliya afi’rinoha ikkirono sase aantete kalqete shaampiyooni beeqqo gedensaanni barete umiha Culku Meedaaliya umisiranna gobbasira borreessiisanno yine agarranni.
Tenne Olompikenni Itophiyu agaramannohu wolu xeertinyi Maaratoone ikkanna meentunna labballunni heedhanno heewo agarrannita ikkitino.
Meentunni kalqete yanna amaddinoti Tigist Asaffitinna kalqete shaampiyoona Amaane Bariisoti afantannoti tini gaamo jawaantetenni miteekkite xeertinyunni beeqqaano balaxaano assitara dandiitanno.
Hattono labballu widoonni albihu Olmpikete beeddakko Qeneniisi Baqqalihu heewo higa hattonni Keeniyunnihu xaggeeffachishanno Atileetichi Eliyud Kipchoge mitte heewo aana xaada Atileetiksete Ispoorte dhaggete ikkite borreessantara dandiitannote.
Qiddist Gezzaheny
Bakkalcho Maaja 25, 2016 M.D
