Itophiyu Pireesete Uurrinsha loosaasinenna maneejimentete miilla techo assitino hasaawinni ‘’Gobba’yara gaadeemmo; hiitte yannarano, hiikkano, hiikko garinnino!’’ yaannohu goboomu woshshattora dawaro qolate aganu damoozansa qaale e’ino.
Uurrinshannihu Korporeetete handaari miseessu loosu harisaanchi kalaa Wondim Tekluhu tenne yannara coyi’ranni; ‘’Itophiya gatisate gaadeemmo; hiitte yannarano, hiikkano, hiikko garinnino’’ yaannohunni gobboommu woshshatto garinni gobbate gargarooshshu olantora irko assate loosasine sumuu yitinota xawisino.
Woshshatto gobboomitte ikkase kaiminni hasi’nanni keere anbbatenna gobba diinunnni gatisate qansootu halante loosa hasiissannota qummi assino.
Xaa yannara gobbanke xaaddinose jifonni ogeeyye olu basera soyaatenni kayse halaalaancho mashalaqqe dagate iillishatenni gobboomitte qeechasi fulanni afamannota kulinohu kalaa Wondimi; gobbate kalaqamino qarri rahotenni tidhamanno gede damoozansa aatenni sae mundeensano aatenni irko assa agarranni yino.
Itophiyu Pireesete Uurrinsha Amadote handaari miseessu sooreessi kalaa Fiqaadu Katamihuno isi widoonni; xaa yannara gobbaydinna giddoydi diinna Itophiya diigate qidhite ka’inotanna kuni hunote assootinsa na’ra fulannokki gede uurrinshate loosaasine ogimmate irkonsa ledo shettote giddo heedhe gobba gatisate hashsha barra sharrantanni afantannori gobbate gargarooshshu olantora hasiissanno irko baala assate uurrinshate loosaasine leellishshino kakkaooshshinna gobbansa baxilli addinta naandanniho yino.
Bakkalcho Woxawaajje 6, 2013 M.D
