Affaar:- Cancishaanchu HWHT juntu Affaarete qoqqowira fenti resura Gaalikoomaho yannate geeshsha caa`litanno keeraano saada ce`e galtinori aana gumulinoha shigiggissanno doddola la”inohunni bero hanafe sasu barrira dadillu barra ikkanno gede Affaarete qoqqowi mootimma lallabbino.
Affaarete qoqqowi amaale mini songaafitte dukko Amiina Seeko tenne hajo la”inohunni uytino xawishshira, juntu Gaalikoomaho keeraanote aana iillishino doddoli lowo geeshsha shagaggisannoha ikkasi xawisse; qoqqowu mootimmano konne dadille la”inohunni sasu barri dadille lallawinota xawissino.
Dhagge habbannoikkita 107 qaaqquulle, 89 seennenna 44 geerri lubbo huninoha kakkachimmate doddola harisinohu HWHT junti hedeweelcho fanino jajjabba olu uduunninni kaa`lantino gawajjonni keeraano saada ce`e galtinore shiinotanna madiissinota hattono magaaziinete giddo nooha wiinamu kaa`lo wo`mu wo`ma huninota qaangannite.
Juntu alba halallate noo waro noosita Affaarete baatto umisi widira qo`late jawaawurro canco gaa`le gumula dandiisannosiha laweennasi assino horonni saada ce`e galtino daga gawajjotenni daafantanno gede assino.
Cancishaanchu HWHT baxxinohunnino Gaalikoomaho shagaggisanno garinni sircho hunate gawajjo gumulino; konneno shagaggisanno doddola la`inohunni Affaarete qoqqowira bero woxawaajje 05/2013 m.d kayse woxawaajje 07/2013 m.d geeshsha dadillu barra ikkanno gedenna Affaarete qoqqowi baandeeri heeshshi yee sutamanno gede qoqqowu mootimma gumultino.
Konne sircho hunate doddola mannimmate qoosso kisanno assoote Itophiyu daganna Itophiyu baxillaano noowa efidhe gibbanno gedenna mishshanno gede qoqqowu woshshatto saysino.
Abebech Maatewoos
Bakkalcho Woxawaajje 6, 2013
