Hawaasa:-Sidaamu Qoqqowa ikke tantanaminkunni mitto diro ale ikkanna, xaa geeshsha afi`noommo kaayya uminke umonke gashshine, seera fushshi`ne, hala`ladunni lophote sharrammanni hee`noommoti dancha kaayyo ikkiturono, Sidaamu konne qoqqowa wolootu qoqqowuba ledo taalo assannohu amaalete mini miilla mootimmate ledo mooranna busha assoote hattono muisha hunate sharrama hasiissannonsata geegisamaanchu amaalete mini miilinna Hawaasi Qooxeesi Shariu yoote mini Pirezidantichi Haji Qaasimi Ademihu coyi’rino.
Haji Qasimi Ademihu hedosi Bakkalcho gaazeexira uyno garinni, daga Sidaamu Dagoomi Qoqqowi mootimma amaalete mini miilla ledo halante moorunniha, bainchu loosi assoote hattono danchu gashshooti qarri buicho sharrante qoorsa dandiituro sidaamu lopho hakko buuxisiisa dandiinannita xawisino.
Amaalete mini miilla dagate xa`mo haadhe yekkeerantannore ikkitino daafira haaru dirira daggannori haaru amaalete mini miilla Siidaamu giddo noo qarra xinqite fushshite amaalete mine kaajjishshe wora hasiissannonsata Haji Qaasimi Ademihu hedosi uyno.
Cabbe gaambeltote Woradi Amaalete mini qaru Songaafichi Kalaa Taadelle yoxxorihuno hedosi aanni, Sidaamu umisi umosi gashshate seeda yanna kawiichinni Sumaalete geeshsha lamunna sasu aganira lekkate hodhitanni assitino sharronninni xa tenne yannara gumu laaleenna qoqqowo ikkine tantanama wole kaayyonni aliidi kaayyo ikkitinota xawise, Sidaamu mitto ikke sharrame qoqqowa adhinonte gede busha asootenna moora hunate baalunku qodhine ka”a hasiissannonke yiino.
Xa gashshitinori deerru deerrunkunni noo motimmate bissa moora agurte, daga amantannonsa garinni dagate heeshsho soorrate loosa hasiissanota xawisinohu Kalaa Taaddele Yoxxorihu, moorunna anga xura maganu albaannino cubbo ikkinota maganu qaalino gubbo ittannorinna sarraaqaari dutte afannoikki woshichooti yanno daafira halaalanya looso calla dagate loosa hasiissannonsa yiino..
Sasenka barra amaalete mini mooranna baincho assoote hattono danchu gashshoti qarra xinqe mittu fushshe yekkeeramanni noota kultinoti Ayirado Dukko Saara Daafursiti Gorchee Woradi Amaalete mini miilaati. Dukko Saara Daafursiti tini soorro daggunkunni amaalete mini miillano ikkito wolootu mitte huuxama nooikiiha xawo assite hasaawate kaayyo afi`ra dandiinoonnita kulte, tene kaayyo horoonsi`ne dagate xa`mo, mooranna baincho assote reqecci assine sharrama dandiinannita hedose wortino.
Gashshitino mootimmano dagate ledo ikkite moora, baincho assotenna danchu gashshooti qarra tirate murcidhe loosa hasiissanonsatana konne qarra iillishanno massagaano aana adhinanni qaafo suffe ha`ra hasiissanno yitinoti Dukko Saara, 2014 M.D miilla ikkite daggannori haaruudu amaalete mini miillanno dagate xa`monna latishshu aana kaajjado yekkeero assite qoqqowanke lossate sharrama hasiissannonsa yitino.
Abrahaam Saamueel
Bakkalcho Woxawaajje 6, 2013
