Hawaasa:- Sidaamu baincho loosonna mooru assoote sharramiro woyyaabbino lopho doogo aana noota Sidaamu Dagoomi Qoqqowi mootimma Pirezidaantichi kalaa Desta Ledamohu xawisino.
Sidaamu Dagoomi Qoqqowi amaale mini 5ki doorshi diro 3ki uurrinshu songo harinsi yannara Qoqqowi Pirezidaantichi kalaa Desta Ledamohunni 2013M.D mixote jeefishshi riipoorte shiqqeenna amaalete mini miilla sasenka barra kaajjadu garinni keente hedonsano wortino.
Qoqqowu giddo albilichono xe’ne noowa taashshinanni konni garinni jawaante hara dandiiniro dagate iillado assine dhuku fajji garinni loosa dandiinironna mooru loosonna muisha gamba assidhannori aana xa hananfoommo qaafo kaajjinshe sufinsiro Sidaamu lophote doogo aana noota qoqqowu pirezidaantichi kalaa Desta Ledamohu xawisino.
Albilicho woyyaabbino lopho abbate dandiisstanno harinsho kaajjinshe sunfannitano coyi’rino.
2013M.D loossate mixo jeefishshu ripoorte aana assinoonni hasaawinni mootimma qoqqowu tantano aana yanna adhiturono loosantino loossa jawaata ikkitinota keennoonnita xawisinohu Pirezidaantichu; loosu jeefo ikkadu garinni gumulsinoonnitanna miinjunna dagoomitte hajubba hattono ga`labbote loosi aana danchu gumi borreessaminota guwursino.
Danchu gashshooti qarra tirate widoonni, Amanyotunna Tsere mussinnu looso xaphoomu Odiitete looso, hattono daga farco afidhanno yoote minna uytanni noo owaante lainohunnno amaalete mini miillanni hala’lado yanna adhine turbine taala hasiissanno hajubba lainohunni raga worroonnitano afate dandiinoonni.
2014M.D loosu baajeette sai dirinni xibbuunni 16 anga lende gaammonnihu konne looso kaajjinshe sufisate ikkinota kulinohu Pirezidaantichu; afi’noonni baajeette hafanfarre nookkiha garunni horoonsi`rate haruunsono assinannita buuxisino.
Federaaletewiinni gaammoonni baajeette ikkadote yine anfannikkitanna gobba noose dhukki deerrinni uytannohura albilichono baajeette ikkado ikkitannokki daafira qoqqowu giddo noo eo garunni gamba assatenni, gaammoonni baajeetteno illacha tungonni loossara, hanafante gumulantukkinni gattino pirojektuwa gumulantanno gede assatenni baajeette hafanfartukkinni horoonsi`rate baalunku qeechasi fula hasiissannotano qaagiisino.
Sidaamu qoqqowi haaro qoqqowo ikkasinni qoqqowu deerrinni ikkikkinni xaa geeshsha alba akkalu qoqqowira hee`neenna uynanni baajeette gaammoonnihura albilicho federaale tonnunku qoqqowi taje mitteenni gamba assite baajeette uytanno daafira ninke taje tenne yannara qoqqowu deerrinni loosantinoikkihura gobboomu deerrinni baalunku qoqqowita taje gamba assitu gedensaanni baajeette bebbeenkanni shallago mitteenni loossanno daafira albilicho taje biddi assine qoqqowoho ikkitanno baajeette gaamma geeshsha xa noota garunni horoonsi`ra hassiissannota lede huwachishino.
Goboomu deerrinni xaa geeshsha ga’labbote qarra ikke noohu cancishaanchu Juntu gaamo hunote assooti gobba ge’annokki gede assanni noo daafira amaalete minino tenne gobboomitte hajora illacha tugge gobbate dayno diina mittimmatenni badhera qolate qoqqowu kaajjillunni loosanni noota qummi assino.
Abrahaam Saamueel
Bakkalcho Woxawaajje 6, 2013 M.D
